ბოლო 24 საათის განმავლობაში, 26 იანვრის 17:00 საათიდან 27 იანვრის 17:00 საათამდე, საქართველოს მასშტაბით, 7 ავტოსაგზაო შემთხვევა მოხდა. ავარიების შედეგად 7 ადამიანი დაიღუპა და 8 დაშავდა.
გთავაზობთ მოკლე მიმოხილვას:
გორში სასწრაფო დახმარების მანქანას „ბე-ემ-ვე“-ს მარკის ავტომობილი შეეჯახა. შემთხვევის შედეგად სასწრაფო დახმარების ჯგუფის მედდა დაშავდა.
გვიან ღამით, რიკოთის გვირაბთან ავტოსაგზაო შემთხვევა მოხდა. ავტომანქანას გზის საპირისპირო მხარეს მოძრავი ტრაილერი დაეჯახა. შემთხვევის შედეგად 5 ადამიანი, მათ შორის ბავშვები ადგილზევე გარდაიცვალნენ. ერთი კი, ხაშურის საავადმყოფოში შეყვანის შემდეგ გარდაიცვალა. მსუბუქი ავტომანქანის მძღოლი გადარჩა, ის ხაშურის საავადმყოფოში მსუბუქი დაზიანებებით შეიყვანეს.
კიდევ ერთი ავტოსაგზაო შემთხვევა მოხდა გვიან ღამით ყვარელში. ავტომანქანაში ერთი ოჯახის 4 წევრი იმყოფებოდა. ავარიას ოჯახის ერთი წევრი ემსხვერპლა. დაშავდა ავტომანქანაში მყოფი სამი ადამიანიც. მსუბუქი ავტომანქანა გზის სავალი ნაწილიდან გადავიდა და ხეს შეეჯახა. ავარიის შედეგად ადგილზე გარდაიცვალა შუახნის ქალი, მძიმედ დაშავდნენ გარდაცვლილის შვილი და რძალი. ასევე, მსუბუქი დაზიანებები მიიღო მცირეწლოვანმა ბავშვმა, რომელსაც დახმარება ადგილზე ჩაუტარდა.
თელავში, სოფელ შალაურში ავტოსაგზაო შემთხვევა მოხდა. ავარიის შედეგად შინაგან საქმეთა სამინისტროს თანამშრომლები დაშავდნენ. მსუბუქი ავტომანქანა ბეტონის კონსტრუქციას შეეჯახა. შეჯახების შედეგად მანქანის მძღოლმა და მგზავრმა სხეულის მძიმე დაზიანებები მიიღეს.
ასპინძაში, სოფელ ნიჯგორთან ავტოსაგზაო შემთხვევა მოხდა. საპირისპიროდ მოძრავი “სუბარუს” და “ჟიგულის” მარკის ავტომობილები ერთმანეთს შეეჯახა. შემთხვევის შედეგად, 20 წლის მამაკაცი დაშავდა.
ავტოსაგზაო შემთხვევა მოხდა თბილისშიც. წერეთლის გამზირზე ერთმანეთს "ბმვ"-სა და "მერსედესის" მარკის ავტომობილები დაეჯახნენ. შემთხვევის შედეგად არავინ დაშავებულა.
5 საათისთვის, ბათუმში, მელიქიშვილისა და ჩაიკოვსკის ქუჩების კვეთაში ავტოსაგზაო შემთხვევა მოხდა. ერთმანეთს "ოპელის" მარკის ავტომანქანა და სამარშრუტო მიკროავტობუსი შეეჯახა. მიკროავტობუსში მგზავრები ისხდნენ, თუმცა, საბედნიეროდ, არავინ დაშავებულა.
ცნობისთვის, შინაგან საქმეთა სამინისტროს გასული წლის მონაცემებით, მხოლოდ 9 თვეში საქართველოში 4 436 ავტოსაგზაო შემთხვევის შედეგად დაიღუპა 384 ადამიანი და დაზარალდა 6 280.
2016 წელს კი, 6 939 ავტოსაგზაო შემთხვევიდან დაზარალდა 9 951 და დაიღუპა 581 ადამიანი.
