თბილისის საქალაქო სასამართლოში დასრულდა ხორავას ქუჩაზე მომხდარი მკვლელობის საქმეზე ბრალდებულ არასრულწლოვანთა სასამართლო პროცესი. დღეს მტკიცებულებათა გამოკვლევის ეტაპი იყო, რისი დასრულებაც მხარეებმა ვერ მოასწრეს და პროცესი ხვალისთვის გადაიდო.
საქმის პროკურორის, ზვიად ფხაკაძის განმარტებით, ზუსტად არის დადგენილი, რამდენი პირი მონაწილეობდა ჩხუბში, რამდენი პირი იყო მიმდებარე ტერიტორიაზე, მაგრამ არასრულწლოვანთა მართლმსაჯულების კოდექსის მიხედვით, გარკვეული სახის ინფორმაციის გამჟღავნებამ, შესაძლებელია, ნეგატიურად იმოქმედოს არასრულწლოვან ბრალდებულებზე.
„სასამართლომ მიიჩნია, რომ ბრალდებულთა მიმართ შეფარდებული აღკვეთის ღონისძიების სახე, პატიმრობა ძალაში დარჩენილიყო. ბრალდების მხარეს მიაჩნია, რომ მტკიცებულებები კანონიერად არის მოპოვებული. დაცვის მხარის მიერ ვრცელდება ინფორმაცია, თითქოს საქმეში არსებული სასამართლო ექსპერტის დასკვნებში დაფიქსირებული დაზიანებები, რომელიც გარდაცვლილებს ჰქონდათ, საქმის მასალებიდან არ გამომდინარეობს, რაც არასწორია.
გარდაცვლილ პირებზე არსებული დაზიანებები და საქმეში არსებული მტკიცებულებები თანხვედრაშია. დაცვის მხარე ასევე აცხადებს, თითქოს საქმეში 2 დანაზე მეტი ფიგურირებს, მაღალი საზოგადოებრივი ინტერესის გამო მოგახსენებთ, რომ საქმეში 2 დანა ფიგურირებს. აღნიშნული არამხოლოდ მოწმეთა ჩვენებით დასტურდება, არამედ სხვა მტკიცებულებებითაც, რომელიც მატერიალური სახით იქნა საქმეზე დამაგრებული. ჩვენთვის გაუგებარია თუ რაზე დაყრდნობით აცხადებს დაცვის მხარე, რომ საქმეში 2-ზე მეტი დანა ფიგურირებს. ჩხუბში ბევრი ადამიანი მონაწილეობდა , თუმცა კონკრეტულ რიცხვს ვერ დაგისახელებთ, იმიტომ არა, რომ ინფორმაცია არ გაგვაჩნია, ზუსტად არის დადგენილი, რამდენი პირი მონაწილეობდა ჩხუბში, რამდენი პირი იყო მიმდებარე ტერიტორიაზე, მაგრამ არასრულწლოვანთა მართლმსაჯულების კოდექსის მიხედვით, გარკვეული სახის ინფორმაციის გამჟღავნებამ, შესაძლებელია, ნეგატიურად იმოქმედოს არასრულწლოვან ბრალდებულებზე“, - განაცხადა პროკურორმა ზვიად ფხაკაძემ.
ცნობისთვის, მომდევნო სასამართლო სხდომა ხვალ - 10 იანვარს, 15 საათზე გაიმართება.
