ხორავას ქუჩაზე მომხდარი არასრულწლოვანთა მკვლელობის საქმის პროკურორის, ზვიად ფხაკაძის განცხადებით, როცა დაკავებული არასრულწლოვანია, მისი დაკავების პერიოდი საგამოძიებო მოქმედებები 40 დღეს არ უნდა აღემატებოდეს.
მისივე თქმით, დღევანდელ სასამართლო პროცესზე ბრალდების მხარე წარადგენს მტკიცებულებებს.
,,რაც შეეხება მტკიცებულებების სახეობას, ბრალდების მხარე ვერ შევა შინაარსობრივ მხარეში, რადგან არასრულწლოვანთა მართლმსაჯულების კოდექსის თანახმად, ბრალდებულთა კანონიერი ინტერესი უდნა იყოს დაცული“, - განაცხადა პროკურორმა.
ზვიად ფხაკაძის თქმით, საქმეზე დაკითხულია 120-მდე პირი.
„ასევე, ჩატარებულია 20-მდე ექსპერტიზა, რომელის შედეგებიც მიღებული გვაქვს და დღევანდელ სხდომაზე წარდგენილი იქნება. დაცვის მხარის არგუმენტი, რომ გამოძიება არაობიექტურად და არასრულყოფილად ჩატარდა, არის სიცრუე და საზოგადოების შეცდომაში შეყვანას ისახავს მიზნად. შემჭიდროვებულ ვადებში, სრულყოფილად და ობიექტურად მოხდა შესაბამისი მტკიცებულებების მოპოვება“, - განმარტა პროკურორმა და დაადასტურა, რომ აღნიშნულ საქმეზე, შესაძლებელია, ბრალდებულთა რიცხვი გაიზარდოს.
„გამოყოფილია ცალკე სისხლის სამართლის საქმე, 5 პირის მიმართ, დანაშაულის დაფარვის ფაქტთან დაკავშირებით და მოცემული გამოძიების ფარგლებში არ არის გამორიცხული, ბრალდებულთა წრე გაფართოვდეს. ბრალდების მხარე ყველა მიმართულებით მუშაობს და ნებისმიერი პირის მიმართ შესაბამის მტკიცებულების მოპოვების შემთხვევაში, ყველა პირი მიეცემა სისხლის სამართლებრივ პასუხისგებაში“, - ამბობს პროკურორი.
მისივე მტკიცებით, საქმეში მხოლოდ 2 ცივი იარაღი მონაწილეობდა, რაც სასამართლოში მტკიცებულების სახით არის წარმოდგენილი.
აღნიშნულთან დაკავშირებით, დანარჩენის გაჟღერებისგან თავს პროკურორი თავს იკავებს, ვინაიდან მისი თქმით, ეს საქმესთან დაკავშირებულ მნიშვნელოვან ინფორმაციას წარმოადგენს.
კითხვაზე, დადგენილია თუ არა, ვინ დაჭრა მესამე მოზარდი, პროკურორი პასუხობს:
„საქმის მასალების მიხედვით, ვისზეც არის დაზიანებები მიყენებული, ყველა პირი იდენტიფიცირებულია, ჩაუტარდათ სამედიცინო ექსპერტიზა, ამ კუთხითაც გამოძიება მიმდინარეობს, თუ რა გარემოებებში მიიღოს აღნიშნულმა პიროვნებებმა დაზიანებები“, - განმარტა პროკურორმა.