იმედია ანა ნაცვლიშვილი განსხვავებულად წარდგება პარლამენტის წინაშე, ვიდრე წინამორბედი, - განაცხადა პრეზიდენტის ახალი საპატლამენტო მდივნის წარდგენის შესახებ საპარლამენტო უმრავლესობის წევრმა გიორგი კახიანმა. მისივე თქმით, ანა ნაცვლიშვილს კვალიფიციურ იურისტად იცნობს.
,,სწორედ ეს არის მთავარი, რადგან მასთან მოგვიწევს ურთიერთობა როგორც პრეზიდენტის საპარლამენტო მდივანთან. ჩვენთვის მნიშვნელოვანია მისი კვალიფიკაცია. იმედი მაქვს, რომ ის ბოლომდე იმ გზას არ გაუყვება, რასაც მისი წინამორბედი - ვგულისხმობ იმას, რომ მის წინამორბედში, არა იურისტს, არამედ პოლიტიკოსს ვხედავდი. პარლამენტში მისი გამოსვლები უფრო პოლიტიზირებული იყო, ვიდრე სამართლებრივი შეფასებებით მოცული. იმედი მაქვს, რომ ამ თვალსაზრისით, ქალბატონი ანა უფრო განსხვავებულად წარმოდგება პარლამენტის წინაშე, როგორც მისი თანამდებობა ითხოვს“, - განაცხადა კახიანმა.
გიორგი მარგველაშვილმა პრეზიდენტის საპარლამენტო მდივნის თანამდებობაზე ანა ნაცვლიშვილი წარადგინა. საპარლამენტო მდივნის თანამდებობა ვაკანტური მას შემდეგ გახდა, რაც საქართველოს პრეზიდენტმა ანა დოლიძე იუსტიციის უმაღლესი საბჭოს წევრად დანიშნა.