დღეს, თბილისის საქალაქო სასამართლოში, პირველ დეკემბერს, ხორავას ქუჩაზე, მოზარდებს შორის სისხლიანი დაპირისპირებისას გარდაცვლილი დავით სარალიძის და ლევან დადუნაშვილის მკვლელობის საქმეზე ბრალდებული ორი არასრულწლოვნის სასამართლო პროცესი გაიმართება.
დღევანდელ პროცესზე სასამართლო მტკიცებულებების დასაშვებობის საკითხს განიხილავს. დაცვის მხარე დღეს რამდენიმე შუამდგომლობასაც დააყენებს.
როგორც ერთ-ერთი ბრალდებულის ადვოკატმა, ტარიელ კაკაბაძემ განაცხადა, დღეს სასამართლომ უნდა განსაზღვროს, რომელმა მხარემ მოიპოვა მტკიცებულებები კანონის დაცვით.
„არის გარკვეული მტკიცებულებები, რომლებიც მიგვაჩნია, რომ კანონდარღვევით არის მოპოვებული, თუმცა, შესაძლოა, ზოგიერთ მათგანზე, ჩვენი სტრატეგიიდან გამომდინარე, არსებითი განხილვის სხდომაზე გავამახვილოთ ყურადღება“, - განაცხადა ადვოკატმა.
როგორც ცნობილი გახდა, საქმეში ფიგურირებს კიდევ ერთი დაჭრილი არასრულწლოვანი, თუმცა ადვოკატის თქმით, გამოძიებისთვის ცნობილი არაა ვინ დაჭრა ის.
„გამოძიებას დადგენილი არ აქვს თუ ვინ დაჭრა ეს მოზარდი, ასევე არის ძალიან ბევრი დეტალი, რომელზეც გამოძიება ვერანაირ ინფორმაციას ვერ გვაწვდის. უამრავი შეკითხვაა, რომელსაც საგამოძიებო უწყება პასუხს ვერ სცემს. ჩვენ დანიშნული გვაქვს კომპლექსური ექსპერტიზა. ვფიქრობთ, რომ შესაძლოა, სხვა პირებიც იყვნენ დაჭრილი. გვსურდა, რომ გამოძიება კიდევ ერთი თვის განმავლობაში გაგრძელებულიყო, რადგან მიგვაჩნია, რომ გამოძიება სრულყოფილად არ არის ჩატარებული. შესაბამისად გვსურდა, რომ ამ ერთი თვის განმავლობაში, კიდევ სხვადასხვა საგამოძიებო მოქმედებები ჩატარებულიყო და პასუხი გაცემოდა უმნიშვნელოვანეს შეკითხვებს , რომელსაც გამოძიება ამ ეტაპზე პასუხს ვერ სცემს, არ გამოვრიცხავ, რომ მას შემდეგ, რაც დაიწყება არსებითი განხილვა და თვითმხილველი პირები დაიკითხებიან, შესაძლოა, სხვადასხვა პირების პასუხისმგებლობის საკითხიც დადგეს. დადასტურდება, რომ ორზე მეტი პირი მონაწილეობდა და ორზე მეტი დანა ფიგურირებს საქმეში. იმ ფონზე , როცა მთავარი კითხვები პასუხგაუცემელია, არ არის დადგენილი, რა მოხდა და როგორ განვითარდა მოვლენები, შეუძლებელია დადასტურდეს ის, რასაც ბრალდება ამბობს. ჩვენ არაფერს ვაღიარებთ, ვაპირებთ, სასამართლოს მომხდართან დაკავშირებით სრული ინფორმაცია მივაწოდოთ, ბრალდებული აპირებს, სასამართლოს მისცეს ჩვენება და ყველა არსებულ კითხვას გასცემს პასუხს, რომელიც საზოგადოებას აწუხებს. სხვა მოწმეების, ასევე, ბრალდებულის დაკითხვის შედეგად, ნათელი მოეფინება ყველა იმ დეტალს რომელიც გვაინტერესებს“, - განაცხადა ადვოკატმა.
აღსანიშნავია, რომ მისი დაცვის ქვეშ მყოფს ბრალი დაუმძიმდა:
"რაც შეეხება ბრალის დამძიმებას, აღნიშნულს არ ვეთანხმებით.
ბრალის დამძიმებას აჯობებდა, საგამოზძიებო ორგანოს საქმეში არსებული კითხვებისთვის გაეცა პასუხი", - აღნიშნა ადვოკატმა.
შეგახსენებთ, ხორავას ქუჩაზე პირველ დეკემბერს მოზარდებს შორის დაპირისპირება მოხდა, რომლის შედეგადაც ერთი მოზარდი ადგილზე გარდაიცვალა, მეორე კი საავადმყოფოში.
სამართალდამცავებმა 2 დეკემბერს მკვლელობაში ბრალდებული ერთი არასრულწლოვანი დააკავეს. განზრახ მკვლელობაში კიდევ ერთ არასრულწლოვან ბრალდებულს ბრალი დაუსწრებლად წარედგინა. ის საგამოძიებო უწყებაში 4 დეკემბერს გამოცხადდა.
