პანკისში ჩატარებული სპეცოპერაციისას დაჭრილ თემირლან მაჩალიკაშვილს სამკურნალოდ თურქეთში გადაიყვანენ. ოჯახმა უკვე თავად შეარჩია კლინიკა, სადაც დაჭრილის გადაყვანა სურს. დაჭრილის ტრასნპორტირებასთან დაკავშირებით მაჩალიკაშვილები ჯანდაცვის სამინისტროს პასუხს ელოდებიან.
საქართველოს უსაფრთხოების სამსახურის პასუხისმგებლობაზე საუბრობს დაჭრილის მამა. მალხაზ მაჩალიკაშვილი ამბობს, რომ პირები, რომლებსაც დღეს ტერორიზმთან კავშირი ედებათ ბრალად, ქვეყანაში თავად უსაფრთხოების სამსახურის თანამშრომლებმა შემოიყვანეს.
„საქართველო მექსიკის სტატუსით ხომ არ არის ყველა ცირკულარით ძებნილი, რომ საქართველოში აღმოჩნდა. ესენი არ ჩამოსულან, ესენი ჩამოიყვანეს. ჩვენ იქით უნდა ჩაგვეტარებინა უსაფრთხოების ჩინოვნიკებზე სპეცოპერაცია იმიტომ, რომ საიდან მოხვდნენ. რატომ აგდებენ საქართველოს საფრთხეში, ხომ შემოიყვანეს,“ - განაცხადა ,,რუსთავი 2“-თან საუბარში თემირლან მაჩალიკაშილის მამამ.
რაც შეეხება პაციენტის მდგომარეობას, წმინდა მიქაელ მთავარანგელოზის სახელობის საავადმყოფოს კლინიკური მენეჯერის, ექიმ ზაზა ლურსმანაშვილის განცხადებით, დაჭრილის მდგომარეობა ამ დრომდე უცვლელია. მისივე თქმით, ამ დროისთვის მიღებულია თანხმობა ორი თურქული კლინიკის მხრიდან, გადაწყვეტილება კი, რომელ კლინიკაში განაგრძობს სპეცოპერაციისას დაჭრილი ახალგაზრდა მკურნალობას, ოჯახმა უნდა მიიღოს.
ლურასმანაშვილის თქმითვე, გერმანულმა კლინიკამ თემირლან მაჩალიკაშვილის მიღებაზე უარი ორჯერ განაცხადა.