"პატრიარქი მხარს არასდროს დაუჭერს კანონპროექტში არსებულ რეგულაციებს, რომლის მიხედვითაც ნებისმიერი ნარკოტიკის, თუნდაც მძიმე ნარკოტიკის მცირე დოზით შეძენა-შენახვა-გადაზიდვა-გადაგზავნა- საზღვარზე უკანონო შემოტანა ექვემდებარებოდეს 100 ლარამდე ჯარიმას", - ამის შესახებ ჯანდაცვის კომიტეტის თავმჯდომარის მოადგილის, დიმიტრი ხუნდაძის განცხადებაშია ნათქვამი.
ხუნდაძის განცხადებას, რომელიც ეხება საქართველოს კათოლიკოს-პატრიარქის, ილია მეორის საშობაო ეპისტოლეში მოხსენიებულ ნარკოპოლიტიკის რეფორმის საკითხს, "ჯი-ეიჩ-ენი" უცვლელად გთავაზობთ:
„პატრიარქმა ბრძანა, რომ აუცილებელია, შემუშავდეს ისეთი ნარკოპოლიტიკა, რომელიც ახალგაზრდებს დაიცავს და შექმნის უარყოფით განწყობას ამ უმძიმეს სენთან მიმართებით.
ასევე საუბრობს სარეაბილიტაციო ცენტრების საჭიროებაზე, მოსწავლეთა ცნობიერების ამაღლებაზე, დემოგრაფიულ კატასრტროფასა და სხვა ღონისძიებაზე და მოგვიწოდებს სწორი, კომპლექსური მიდგომისკენ, განსაკუთრებული სიფრთხილისა და წინდახედულობისკენ.
ეს არის სწორი ფორმულირება. პატრიარქი ბუნებრივია არ შევიდოდა კანონპროექტის განხილვაში, მაგრამ ასევე ცხადია, რომ უწმინდესი მხარს არ დაუჭერს იმგვარი რეგულაციების შემოღებას, რომლითაც ნარკოტიკების მომხმარებელთა რაოდენობა არათუ შემცირდება, არამედ, პირიქით, გაიზარდება. ჩვენ ვეთანხმებით, რომ სარეაბილიტაციო ცენტრები უნდა აშენდეს, დაზუსტდეს საჯარიმო სანქციები, რომ ის უნდა აღწევდეს კონკრეტულ მიზანს.
სრულიად ვეთანხმები უწმინდესს და არაერთხელ დამიფიქსირებია პოზიცია, რომ ნარკოტიკების მომხმარებელი არ უნდა დავიჭიროთ, თუმცა, არ უნდა შევუწყოთ ხელი მოხმარების გავრცელებას, რის საშუალებას პარლამენტში ინიცირებული კანონპროექტი ნამდვილად იძლევა. რისკები საკმაოდ მაღალია.
პატრიარქი მხარს არასდროს დაუჭერს კანონპროექტში არსებულ რეგულაციებს, რომლის მიხედვითაც ნებისმიერი ნარკოტიკის, თუნდაც მძიმე ნარკოტიკის მცირე დოზით შეძენა-შენახვა-გადაზიდვა-გადაგზავნა- საზღვარზე უკანონო შემოტანა ექვემდებარებოდეს 100 ლარამდე ჯარიმას (ადმინისტრაციულ სამართალდარღვევათა კოდექსის 45-ე მუხლი). თუნდაც იმას, რომ ადამიანებმა 1 აბი სუბოტექსით იარონ და არავითარი პასუხისმგებლობა დაეკისროთ, არადა, 1 აბი სუბოტექსის ინექციური მოხმარება 8-10 მომხმარებლის ნარკოტიკულ თრობას იწვევს. არასრულწლოვნებთან ერთად, მათი თანდასწრებით ნარკოტიკების მოხმარების ფაქტი მხოლოდ 200 ლარამდე ჯარიმას ექვემდებარებოდეს. ამდაგვარი კანონპროექტი აუცილებლად გამოიწვევს მოხმარების აფეთქებას.
მე პატრიარქის ეპისტოლე ზუსტად ისე გავიგე, როგორც ეს პატრიარქმა ბრძანა და ჩვენი ბრძენი უწმინდესი ერის განადგურებისა და ნარკოტიკების მომხმარებელთა აფეთქების მხარდამჭერი ვერასდროს იქნება”, - აცხადებს დიმიტრი ხუნდაძე.
შეგახსენებთ, ილია მეორეის საშობაო ეპისტოლეში აღნიშნუალია, რომ აუცილებელია, შემუშავდეს ისეთი ნარკოპოლიტიკა, რომელიც ახალგაზრდებს დაიცავს და შექმნის უარყოფით განწყობას ამ უმძიმეს სენთან მიმართებით:
"ადამიანი ცდილობს, გაექცეს რეალობას, მაგრამ გზააბნეული ხსნას ძირითადად ნარკოტიკის მოხმარებაში ხედავს, რითაც მდგომარეობას კიდევ უფრო ირთულებს...
.. აუცილებელია, შემუშავდეს ისეთი ნარკოპოლიტიკა, რომელიც ახალგაზრდებს დაიცავს და შექმნის უარყოფით განწყობას ამ უმძიმეს სენთან მიმართებით. უნდა აშენდეს სარეაბილიტაციო ცენტრები, სასკოლო ასაკიდანვე უნდა მოხდეს მოსწავლეთა ცნობიერების ამაღლება და გატარდეს სხვა ღონისძიებები", - ნათქვამია პატრიარქის საშობაო ეპისტოლეში.
