თემირლან მაჩალიკაშვილის მისაღებად მზადყოფნა თურქეთის ორმა კლინიკამ გამოთქვა, - განაცხადა ჟურნალისტებთან წმინდა მიქაელ მთავარანგელოზის სახელობის მრავალპროფილიანი კლინიკური საავადმყოფოს კლინიკურმა მენეჯერმა ზაზა ლურსმანაშვილმა.
მისი განმარტებით, ამ ორი კლინიკიდან ერთი არის საქართველოს ჯანდაცვის მიერ მოძიებული, ხოლო მეორე კი ოჯახის მიერ მოძიებული კლინიკა. ექიმი ამბობს, რომ ოჯახის გადასაწყვეტია მათ მიერ მოძიებულ „კოჩის ჰოსპიტალში“ მოხდება პაციენტის გადაყვანა, თუ ჯანდაცვის სამინისტროს მიერ თურქეთში მოძიებულ კლინიკაში.
„ჯანდაცვის სამინისტროსგან ცოტა ხნის წინ მივიღეთ ოფიციალური ინფორმაცია, რომ თურქეთის ერთ-ერთმა კლინიკამ გამოხატა მზადყოფნა იმისთვის, რომ მოხდეს ჩვენი პაციენტის ტრანსპორტირება და იქ გაგრძელდეს მკურნალობა. ეს ინფორმაცია ჩვენ შემდეგ გავაცანით ოჯახის წევრებს და ველოდებით მათი მხრიდან დასტურს. თურქულ კლინიკას ადგილის პრობლემა არ აქვს და მზად არის, რომ უახლოეს პერიოდში მიიღოს პაციენტი“, - განაცხადა ექიმმა.
მისივე განმარტებით თემირლან მაჩალიკაშვილის ჯანმრთელობის მდგომარეობა უცვლელია და კვლავ მძიმედ რჩება. არ არის გამორიცხული, რომ თემირლან მაჩალიკაშვილი თურქეთში ხვალვე გადაიყვანონ.
