პრეზიდენტის ადმინისტრაციის უფროსი გიორგი აბაშიშვილი და ეროვნული უშიშროების საბჭოს მდივანი დავით რაქვიაშვილი ბათუმში ევროკლუბს ეწვივნენ, რომელიც პრეზიდენტის სარეზერვო ფონდის მხარდაჭერით შეიქმნა.
პროექტი ორიენტირებულია ახალგაზრდებზე და აქტივობების საშუალებით მათში ევროინტეგრაციის პოპულარიზაციაზე. დღეს გიორგი აბაშიშვილი და დავით რაქვიაშვილი ევროკლუბში ბათუმის სამი საჯარო სკოლის უფროსკლასელებსა და სამი უმაღლესი სასწავლებლების სტუდენტებს შეხვდნენ.
გიორგი აბაშიშვილის განცხადებით, ევროკლუბის არსებობა საშუალებას აძლევს ახალგაზრდებს და სხვა დაინტერესებულ პირებს ძირითადი ევროპული ღირებულებების შესახებ მიიღონ ინფორმაცია. ახალგაზრდებთან შეხვედრისას საუბარი შეეხო ევროპულ ღირებულებებს და უსაფრთხოების გამოწვევებს.
გიორგი აბაშიშვილმა ყურადღება გაამახვილა მიმდინარე და უკვე განხორციელებულ საკონსტიტუციო რეფორმაზე, პრეზიდენტის ინსტიტუტზე დასავლეთ ევროპის ქვეყნებში, ადმინისტრაციული და სტრუქტურული რეფორმების ეფექტიანობაზე და ახალი კონსტიტუციით პრეზიდენტის როლზე.
მისი თქმით, დღეს გამართული დისკუსია, რომელიც მდგრადი სახელმწიფოს ჩამოყალიბების პროცესში დემოკრატიული ინსტიტუტების მნიშვნელობას შეეხო, ახალგაზრდებს საშუალებას მისცემს შეაფასონ მიმდინარე პროცესები და აქტიური მონაწილეობა მიიღონ მასში.
დავით რაქვიაშვილმა კი, ხაზი გაუსვა ჩვენი ქვეყნის წინაშე მდგარ ეროვნული უსაფრთხოების გამოწვევებზე, რეგიონში არსებულ ვითარებაზე, უსაფრთხოების უზრუნველყოფის გარანტიებსა და პერსპექტივებზე ნატოსა და აშშ-ს ალიანსების ჭრილში და ახალი კონსტიტუციით განსაზღვრულ უშიშროების საბჭოს ინსტიტუციურ რეფორმაზე.
