მესტიაში მშენებარე "მესტია-ჭალა ჰესის" მიმდებარედ „სვანეთის ახალგაზრდული მოძრაობის“ ორგანიზიებით, მეორე დღეა საპროტესტო აქცია მიმდინარეობს.
მისი მონაწილეები სვანეთში ჰესების მშენებლობის შეჩერებას ითხოვენ. მათი მოთხოვნით, ჰესის მშენებელმა კომპანიამ ტექნიკა უნდა გაიყვანოს. "გავაფრთხილეთ კომპანია, რომ შეწყვიტოს სამშენებლო სამუშაოები. დავაკვირდებით, როგორ მოიქცევიან და იმის მიხედვით ვიმოქმედებთ", - განაცხადა აქციის ერთ-ერთმა მონაწილემ.
„სვანეთის ახალგაზრდული მოძრაობა“ ასევე წერილით მიმართავს საქართველოს პრეზიდენტსა და პრემიერმინისტრს, რომ დაიწყოს ფართომასშტაბიანი დისკუსია სახელმწიფო ინსტიტუციებს შორის, მოიწვიონ მაღალი კვალიფიკაციის ექსპერტები და სწორად მოხდეს პრიორიტეტების განსაზღვრა. წინააღმდეგ შემთხვევაში, აქციის მონაწილეები, სვანეთის მკვიდრი მოსახლეობა, როგორც თვითონ ამბობენ, მიმართავს კონსტიტუციით მინიჭებულ უფლებას და გამოიყენებს ყველა ლეგიტიმურ ხერხს, სვანეთში ჰესებისა და ოქროს მოპოვებითი პროექტების შესაჩერებლად.
როგორც ცნობილია, „მესტიაჭალა 1" და „მესტიაჭალა 2" ჰიდროელექტროსადგურების მშენებლობას საფუძველი 2017 წლის 6 ივნისს ჩაეყარა, დასრულება და ექსპლუატაციაში შესვლა 2018 წლის დეკემბერშია დაგეგმილი. ჰესების ექსპლუატაციაში გაშვების შემდეგ ენერგოსისტემას 175 მილიონი კვტ/სთ შეემატება.
