ბელარუსის პრეზიდენტის, ალექსანდრ ლუკაშენკას განცხადებით, უკრაინის პრეზიდენტის ვინაობა დონალდ ტრამპმა კი არა, უკრაინელმა ხალხმა უნდა გადაწყვიტოს.
ამის შესახებ ლუკაშენკამ ჟურნალისტების კითხვებზე პასუხისას განაცხადა.
„გინდათ, როგორც პოლიტიკოსმა გიპასუხოთ თუ არსებითად? არსებითად თუ ვიტყვით, ტრამპის გადასაწყვეტი არ არის ვინ იქნება უკრაინის პრეზიდენტი, ამას უკრაინელი ხალხი გადაწყვეტს“, - განაცხადა ლუკაშენკამ.
ამასთან, ბელარუსის ლიდერმა აღნიშნა, რომ ვოლოდიმირ ზელენსკი თავის დროზე პრეზიდენტის პოსტზე მხოლოდ ერთი ვადით დარჩენას დაჰპირდა საზოგადოებას.
„დანაპირები უნდა შეასრულო. არჩევნებზე უნდა წახვიდე. ამაში ტრამპი მართალია: თუ დაჰპირდი, დანაპირები უნდა შეასრულო. მაგრამ კარნახი საჭირო არ არის. ტრამპმა უკრაინას არ უნდა უკარნახოს, როგორ იმოქმედოს“, - დასძინა ლუკაშენკომ.
შეგახსენებთ, აშშ-ის პრეზიდენტმა დონალდ ტრამპმა უკრაინის პრეზიდენტი ვოლოდიმირ ზელენსკი ომის დასრულების სურვილის არქონაში დაადანაშაულა და განაცხადა, რომ უკრაინისთვის „ახალი ლიდერის არჩევის დროა“.
ტრამპის ბოლო განცხადებების შემდეგ ზელენსკიმ განაცხადა, რომ მზად არის უკრაინაში საპრეზიდენტო არჩევნები ჩაატაროს, თუ რუსეთის პრეზიდენტი ვლადიმურ პუტინი 60-დღიან ცეცხლის შეწყვეტას დათანხმდება.
