საქართველოში სამუშაო ვიზიტით უკრაინის ვიცე-პრემიერი, სერგეი ტიგიპკო ჩამოვიდა. ვიზიტის ფარგლებში იგი საქართველოს პრემიერ - მინისტრ ნიკა გილაურს, პარლამენტის თავმჯდომარე დავით ბაქრაძეს და ეროვნული ბანკის პრეზიდენტს, ირაკლი ქადაგიძეს შეხვდება.
ტიგიპკო საქართველოში ეკონომიკური და შინაგან საქმეთ სამინისტროს მიმართულებით განხორციელებულ რეფორმებს გაეცნობა.
"ჩამოვედი საქართველოში რათა პირადად გავეცნო იმ რეფორმებს, რომლებიც ამ ქვეყნის ხელისუფლებამ გაატარა. ჩვენს განსაკუთრებულ ინტერესს იწვევს რეფორმები, რომლებიც ეკონომიკურ და შინაგან საქმეთა სამინისტროს მიმართულებით განხორციელდა. ასევე, გვაინტერესებს ახალი საგადასახადო კოდექსი. გვაინტერესებს როგორ არეგულირებთ ეკონომიკას. ჩვენი ქვეყანა ახლა გარდამავალ ეტაპზე იმყოფება, საქართველოში გატარებულ რეფორმებზე კი ბევრი გვსმენია და ბევრიც დაწერილა. გვინდა, რომ ჩვენი კოლეგებისგან კონსულტაციები მივიღოთ", - განაცხადა ტიგიპკომ თბილისის საერთაშორისო აეროპორტში, ჟურნალისტებთან საუბრისას.
