რამდენიმე წუთის წინ დატოვა ბათუმის მთავარი სამმართველოს შენობა დეკანოზ გიორგი მამალაძის ძმამ, მალხაზ მამალაძემ.
„ბათუმის სამმართველოში დაახლოებით, 3 საათის განმავლობაში ვიმყოფებოდი. სამართალდამცავებმა მომხდართან დაკავშირებით გამომკითხეს, აინტერესებდათ იმ ადამიანს ხომ არ ვიცნობდი, სადაური შეიძლებოდა ის ყოფილიყო და ა.შ. ჩემს სახლში ექსპერტები მუშაობდნენ, ახლა მეც ექსპერტიზაზე მივდივარ, ის ადამიანი ხელით შემეხო და უნდა გაარკვიონ, დაზიანებები მაქვს თუ არა. თუმცა, ეს შეხება დაშინების და გაჩერების მიზნით იყო.
„ის პიროვნება აჭარის მკვიდრი ნამდვილად არ იყო, აღმოსავლური კილო ჰქონდა. იმედია, ამ საქმეს გამოიძიებენ და ამ უკანონო ქმედების გამო ის ადამიანი დაისჯება“, - განუცხადა „ჯი-ეიჩ-ენს“ მალხაზ მამალაძემ.
როგორც შინაგან საქმეთა სამინისტროში აცხადებენ, საქმის ძიება სსკ-ს 19/178-ე, ძარცვის მცდელობის მუხლით დაიწყო.
შეგახსენებთ, რომ დღეს დილით, დეკანოზ გიორგი მამალაძის ძმას, მალხაზ მამალაძეს სახლში შავებში ჩაცმული, „კაპიშონიანი“ მამაკაცი მიეჭრა და ფული მოსთხოვა. როგორც მამალაძეები აცხადებენ, ეს ფაქტი მათ დაშინებას ემსახურება.
