აშშ-ის წარმომადგენელთა პალატის დემოკრატების ლიდერმა ჰაკიმ ჯეფრისმა თავდაცვის მდივან პიტ ჰეგსეთის იმპიჩმენტის შესაძლებლობას მხარი დაუჭირა. ამის შესახებ მან კვირას, 8 ნოემბერს განაცხადა. ინფორმაციას Bloomberg ავრცელებს.
ჯეფრისმა, რომელიც შესაძლოა ისტორიაში წარმომადგენელთა პალატის პირველი შავკანიანი სპიკერი გახდეს, განაცხადა, რომ შესაბამის რეზოლუციას „კატეგორიულად უჭერს მხარს“.
„ეგრეთ წოდებულმა თავდაცვის მდივანმა ბოროტად გამოიყენა საკუთარი უფლებამოსილება, საფრთხე შეუქმნა ჩვენს ეროვნულ უსაფრთხოებას და საკუთარი გადაწყვეტილებით წამოიწყო ეს დაუფიქრებელი და ძვირადღირებული ომი ირანში, რამაც ამერიკელი ხალხისთვის ფასების მკვეთრი ზრდა გამოიწვია და ქვეყანა უფრო ნაკლებად უსაფრთხო გახადა“, - განაცხადა წარმომადგენელთა პალატის დემოკრატების ლიდერმა.
მისი თქმით, წარმომადგენელთა პალატის დემოკრატი წევრები, შესაძლო რეზოლუციას სამშაბათს, 10 ნოემბერს განიხილავენ. ეს იქნება მათი პირველი შეხვედრა მას შემდეგ, რაც შუალედურ არჩევნებში კონგრესის ორივე პალატაში გაიმარჯვეს.
შეგახსენებთ, რომ მედიის ცნობით, აშშ-ის წარმომადგენელთა პალატამ შესაძლოა ირანთან ომის გამო ჰეგსეთის იმპიჩმენტის საკითხი კენჭისყრაზე გაიტანოს.
ამასთან, აშშ-ის პრეზიდენტმა დონალდ ტრამპმა ჟურნალისტებთან საუბრისას განაცხადა, რომ თავდაცვის მდივნის შეცვლას არ განიხილავს.
ტრამპმა ეს განცხადება მას შემდეგ გააკეთა, რაც მედიაში გავრცელდა ინფორმაცია, რომ მან მრჩევლებს როგორც პირადად, ისე სატელეფონო საუბრისას ჰკითხა, უნდა დარჩეს თუ არა ჰეგსეთი თანამდებობაზე კონგრესის შუალედურ არჩევნებში რესპუბლიკელების დამარცხების შემდეგ.
