საქართველოს პრემიერ-მინისტრი გიორგი კვირიკაშვილი ევროპული საბჭოს პრეზიდენტ დონალდ ტუსკს შეხვდა.
ნიუ-იორკში, გაერო-ს შტაბბინაში გამართულ შეხვედრაზე მხარეებმა საქართველო-ევროკავშირის ორმხრივ ურთიერთობაზე, ქვეყანაში მიმდინარე რეფორმებსა და საქართველოს ოკუპირებულ ტერიტორიებზე არსებულ ვითარებაზე ისაუბრეს.
მთავრობის მეთაურმა დონალდ ტუსკს საქართველოში მიმდინარე პოლიტიკურ-ეკონომიკური რეფორმების შესახებ დეტალური ინფორმაცია მიაწოდა, რომელსაც ევროკავშირი მტკიცედ უჭერს მხარს. საუბარი ასევე შეეხო საქართველოს ოკუპირებულ ტერიტორიებზე არსებულ ვითარებას.
ევროპული საბჭოს პრეზიდენტმა კიდევ ერთხელ დაადასტურა ევროკავშირის ურყევი მხარდაჭერა საქართველოს ტერიტორიული მთლიანობის, სუვერენიტეტისა და ყველა იმ პროცესისადმი, რაც დაკავშირებულია საქართველოს ევროპულ ოჯახში ინტეგრაციასთან.
შეხვედრას საქართველოს საგარეო საქმეთა მინისტრი მიხეილ ჯანელიძე და მინისტრის პირველი მოადგილე დავით ზალკალიანი დაესწრნენ.
