დაწყებული გვაქვს მუშაობა რეკომენდაციებზე და საქართველოს ხელისუფლებას მესამე მოსმენამდე მოსაზრებების პროექტს გადავცემთ, - ამის შესახებ საკონსტიტუციო ცვლილებების პროექტთან დაკავშირებით საზოგადოებრივ მაუწყებელს ვენეციის კომისიაში განუცხადეს.
მათი ინფორმაციით, საქართველოს ხელისუფლებამ ვენეციის კომისია დაარწმუნა რომ ცვლილების განხორციელება მესამე მოსმენის დროს შესაძლებელია.
„როგორც იცით, ჩვენ რეკომენდაციის მოსამზადებლად მივიღეთ ტექსტი. საქართველოს ხელისუფლებამ დაგვარწმუნა, რომ ცვლილების განხორციელება მესამე მოსმენის დროს შესაძლებელია. ამის გამო, ჩვენ დაწყებული გვაქვს მუშაობა რეკომენდაციებზე და საქართველოს ხელისუფლებას მესამე მოსმენამდე მოსაზრებების პროექტს გადავცემთ. საკითხი უკვე შეტანილია ვენეციის კომისიის ოქტომბრის პლენარული სესიის დღის წესრიგში“, - აღნიშნავენ ვენეციის კომისიაში.
