საქართველოში ამერიკის შეერთებული შტატების ელჩი ჯონ ბასი რუსეთის ფედერაციის საგარეო საქმეთა სამინისტროს განცხადებას გამოეხმაურა.
როგორც ბასმა ჟურნალისტებს განუცხადა, ამერიკის გზავნილი ცალსახა და ნათელია, რომ აშშ-სა და რუსეთს შორის საქართველოს საკითხზე უთანხმოება კვლავ შენარჩუნებულია.
"ეს უთანხმოება ეხება იმ ვითარებას, რომელიც დღეისთვის საქართველოში არის შექმნილი, თუმცა მან ხელი არ უნდა შეგვიშალოს გავაგრძელოთ მოლაპარაკება და შექმნილი ვითარებიდან გამოსავალი მოვძებნოთ", - განაცხადა ჯონ ბასმა.
შეგახსენებთ, რომ რუსეთის საგარეო საქმეთა სამინისტრომ აშშ-ს სახელმწიფო მდივნის ჰილარი კლინტონის მიერ საქართველოში გაკეთებულ განცხადებებს სპეციალური განცხადებით გამოეხმაურა და აღნიშნა, რომ ჰილარი კლინტონის მიერ გაკეთებული განცხადებები "რუსეთის მიერ საქართველოს ტერიტორიის ოკუპაციის შესახებ" უსაფუძვლოა.
