საქართველოს პარლამენტის თავმჯდომარის მოადგილე, გიგი წერეთელი შეხვდა საბერძნეთის სრულუფლებიან ელჩს საქართველოში გეორგიო ხაძიმეკელაკისს. საუბარი შეეხო ეუთოს საპარლამენტო ასამბლეის ახალი პრეზიდენტის არჩევნებს, რომელშიც ერთ-ერთ კანდიდატად საბერძნეთის წარმომადგენელიც იქნება წარდგენილი. არჩევნები ოსლოში ზაფხულის სასესიო სხდომაზე გაიმართება 6-10 ივლისს.
პარლამენტის თავმჯდომარის მოადგილემ და საბერძნეთის ელჩმა ისაუბრეს საქართველოში ადგილობრივი თვითმმართველობის არჩევნების შედეგებზე, მიმდინარე რეფორმებზე, სამთავრობო და სტრუქტურულ ცვლილებებზე, ეკონომიკურ და პოლიტიკურ სიტუაციაზე. ელჩმა კიდევ ერთხელ დაადასტურა საბერძნეთის მხარდაჯერა საქართველოს დემოკრატიული განვითარებისადმი. მან წერეთელს საბერძნეთში არსებული ფინანსურ-ეკონომიკური კრიზისის დეტალები, კრიზისის დაძლევის სტრატეგია და მასთან დაკავშირებული პოლიტიკური სიტუაცია გააცნო.
