,,ნაციონალური მოძრაობა” გზების დეპარტამენტს კორუფციაში ადანაშულებს. პარტიის წევრმა ოთარ სირაძემ დღეს გამართულ ბრიფინგზე განაცხადა, რომ გზების დეპარტამენტის უფროსი გიორგი სეთურიძე ხორვატიულ საპროექტო კომპანია IGH-ს ლობირებს. ოპოზიციური პარტიის ცნობით, გასულ წელს ამ კომპანიამ საზედამხედველო სამუშაოს გ ანხორციელების უფლება ტენდერის გზით მოიპოვა. სირაძე ირწმუნება, რომ IGH-სთვის სატენდერო პირობები წინასწარ იყო ცნობილი. ნაციონალური მოძრაობის წევრის განცხადებით, ხორვატიულ კომპანიას 40-ც მილიონიანი ხელშეკრულება გაუფორმეს.
„გასულ წელს გზების დეპარტამენტში გამოჩნდა სამ კაციანი ხორვატიული ჯგუფი, რომელმაც რამდენიმე ქართულ საპროექტო კომპანიას შესთავაზა ხელშეკრულების დადება ისეთი სამუშაოების შესრულებაზე, რომლებზეც ტენდერი ჯერ კიდევ გამოცხადებულიც კი არ იყო. კითხვაზე, თუ რატომ იყვნენ დარწმუნებული ხორვატები კონკრეტული ტენდერების გამარჯვებაში, მათი ხელმძღვანელის ნებოშა გრზუნოვის პასუხი იყო რომ მათ „გარკვეული“ და „დალაგებული“ ჰქონდათ ტენდერების საკითხები გზების დეპარტამენტის უფროსთან და რომ ისინი აუცილებლად გაიმარჯვებდნენ."-განაცხადა სირაძემ.
ნაციონალურ მოძრაობაში ამბობენ, რომ ეს არ არის ერთადერთი პროექტი, რაც გზების დეპარტამენტში ამ კონკრეტულ ხორვატულ კომპანიას უკავშირდება, მას ასევე მოგებული აქვს რამდენიმე სხვა ტენდერი, რომელთა შესასრულებელი სამუშაოების ღირებულება ჯამში 59 მლნ.ლარი.
ნაციონალური მოძრაობა პროკურატურისა და აუდიტის სამსახურისგან ამ ფაქტების შესწავლას და გამოძიებას ითხოვს.