მაუწყებლობის სარედაქციო პოლიტიკაში შეიცვლება ის, რომ ტელევიზია ერთი პარტიის საკუთრებაში არ იქნება, ის კრიტიკული და სახალხო მედია გახდება, - აცხადებს ბიზნესმენი ქიბარ ხალვაში ,,იმედთან” საუბარში. მისივე თქმით, არ შეიძლება ტელეკომპანიაში შესვლის საკითხი, წლობით გაგრძელდეს.
,,უახლოეს მომავალში „რუსთავი 2“-ში ალბათ შევალთ. მაგრამ ეს ძალდატანებით არ იქნება. ჩვენი შესვლით შეიცვლება ის, რომ ერთი პარტიის ტელევიზია არ იქნება, იქნება საქართველოს და ხალხის მედია. კრიტიკული ტელევიზია და არა პარტიული.. ძალის გამოყენებას არ ვაპირებთ, ეს სახელმწიფოს უპირისპირდება. ჩვენ, საკუთარ თავზე გვაქვს უკანონობა განცდილი. დაგვიწვეს, წაგვართვეს, ხალხი უმუშევარი დატოვეს. აღსრულების ფურცლის გარეშე შემოვიდნენ და ქონება გაზიდეს, ვერაფერი ვერ გავაკეთეთ, იმიტომ, რომ სახელმწიფო ჩვენს წინააღმდეგ უკანონო იყო“,-განაცხადა ქიბარ ხალვაშმა.
უზენაესი სასამართლოს ცხრა მოსამართლის გადაწყვეტილებით, ქიბარ ხალვაში ტელეკომპანია „რუსთავი 2-ის“ 100%-იანი წილის მფლობელია. განჩინების მიხედვით, „რუსთავი 2-ის" 60%-იანი წილის მესაკუთრედ ცნობილია ხალვაში, ხოლო 40% კი მის კუთვნილ შპს „პანორამას“ გადაეცა.