როგორც არ უნდა დამთავრდეს ,,რუსთავი 2“-ის საქმე, დღეს საქართველოს ცხოვრებაში ახალი ისტორიული ეტაპი იწყება, - ამის შესახებ ,,ნაციონალური მოძრაობის” წევრმა რომან გოცირიძემ უზენაეს სასამართლოსთან ტელეკომპანია ”რუსთავი 2”-ის მხარდამჭერ აქციაზე სიტყვით გამოსვლისას განაცხადა.
,,გაიმარჯვებს ”რუსთავი 2”? გაიმარჯვებს საქართველოში დემოკრატიული განვითარების პერსპექტივა და ”რუსთავი 2” იქნება ის, რომელიც გადაარჩენს საქართველოში თავისუფალ სიტყვას და გადაარჩენს იმ ტელევიზიებს, იმ მედია საშუალებებს, რომლებიც დღეს ფაქტობრივად ხელისუფლების წნეხის ქვეშ არიან. წაიღებენ ”რუსთავი 2”-ს? - ხელისუფლება განაჩენს გამოუტანს საკუთარ თავს. ეს აჩვენა მრავალი ქვეყნის ისტორიამ, რომ ხელისუფლების მიერ საზოგადოებრივი ცხოვრების ყველა სფეროს უზურპაცია ყოველთვის ხელისუფლების მარცხით მთავრდება. დღეს ”რუსთავი 2” ფაქტობრივად იწყებს ხელისუფლების დამარცხებას ერთსა და მეორე შემთხვევაშიც”, - განაცხადა რომან გოცირიძემ და მოსამართლეებს მიმართა.
”დღევანდელი თქვენი გადაწყვეტილების შემდეგ ნათელი გახდება - თქვენ შეგიძლიათ გამოხვიდეთ ქუჩაში და ჩამოგართვან ადამიანებმა ხელი, თუ თქვენ იქნებით სამუდამოდ იზოლირებული ქართველი ხალხისგან. არჩევანი თქვენია. გააკეთებთ სწორ არჩევანს? მაშინ გაქვთ მორალური უფლება, რომ იყოთ ამ ქვეყნის მოქალაქე, არ გააკეთებთ? - ისტორია დაგსჯით თქვენ, დაგსჯით ყველას, ვინც ამ მდგომარეობაში ჩააგდო საზოგადოება და ჩვენი ტელევიზია. ჩვენ აუცილებლად გავიმარჯვბთ”- განაცხადა გოცირიძემ.
