უშიშროების საბჭო ეროვნული თავდაცვის საბჭოდ გარდაიქმნება და საომარი მდგომარეობის დროს იმოქმედებს, - ამის შესახებ პარლამენტის თავმჯდომარემ სახელმწიფო საკონსტიტუციო კომისიის გაერთიანებულ სხდომაზე განაცხადა, სადაც მან კომისიის წევრებს საკონსტიტუციო რეფორმასთან დაკავშირებით მმართველი გუნდის ხედვა გააცნო.
,,არსებითი ცვლილება, რაც შეიძლება შეეხოს პრეზიდენტის კომპეტენციების სფეროს, ჩვენი ხედვით დაკავშირებულია უშიშროების საბჭოსთან. ჩვენ ამაზე გვქონდა მსჯელობა წინა სხდომაზე. დღეს გვაქვს უფლებამოსილებების სრული აღრევა. რეალურად მოქმედებს ორგანო, რომელიც რჩევას აძლევს პრეზიდენტს ისეთ საკითხებზე, რაც არის მთავრობის კომპეტენცია. ეს არის აბსოლუტური აღრევა, რაზეც აქტიურად საუბრობდნენ 2010 წელს ვენეციის კომისიის ექსპერტები. ამ ყველაფრის გათვალისწინებით, გვქონდა მსჯელობა იმაზე, რომ უშიშროების საბჭო გარდაიქმნას ეროვნული თავდაცვის საბჭოდ. ისევე როგორც დღეს, მას დარჩება არსებითად თავდაცვის სფეროში უფლებამოსილებები, უბრალოდ განსხვავებით დღევანდელი მოდელისგან, ეროვნული თავდაცვის საბჭო იმოქმედებს საომარი მდგომარეობის დროს. სპეციალური მუხლი იქნება კონსტიტუციაში, რომლის მიხედვითაც, საომარი მდგომარეობსი დროს ჩამოყალიბდება ეროვნული თავდაცვის საბჭო. მისი თავმჯდომარე იქნება პრეზიდენტი, ეყოლება მუდმივი წევრები და მისი საქმიანობა უზრუნველყოფილი იქნება პრეზიდენტის ადმინისტრაციის მიერ“, - განმარტა ირაკლი კობახიძემ.
პარლამენტის თავმჯდომარემ კომისიის წევრებს საკონსტიტუციო რეფორმასთან დაკავშირებით მმართველი გუნდის ხედვა გააცნო.
