თბილისის მერი, დავით ნარმანია, აცხადებს, რომ უსაფრთხოების ნორმებიდან გამომდინარე ბავშვთა სამყაროს შენობაში ჯერჯერობით მოვაჭრეების შეშვება არ მოხდება.
„ჩემი დავალების საფუძველზე ზედამხედველობის სამსახურმა გასცა წერილობითი მითითება ბავშვთა სამყაროს ადმინისტრაციის მიმართ, რათა უსაფრთხოების ნორმები დავიცვათ და თავისუფლად შეღწევა არ იყოს შესაძლებელი,“ - აცხადებს დავით ნარმანია.
ქალაქის მერმა ასევე აღნიშნა, რომ შენობაში მიმდინარეობს დაზიანებული ნაწილების მოხსნა და ზოგიერთი ნაწილის გამაგრება, რის გამოც ვერ მოხერხდება დაზარალებული მოვაჭრეების შეშვება.
„მოქმედი კანონმდებლობის ნორმებიდან გამომდინარე მივეცით მითითება, რომ ტერიტორია იყოს უსაფრთხო, ვინაიდან იქ იწყება დაზიანებული ნაწილის მოხსნასთან, ზოგიერთი ნაწილის გამაგრებასთან დაკავშირებული სამუშაოები, რათა შემდგომ მეპატრონეებმა შეძლონ შესვლა და გადარჩენილი საქონლის გამოტანა. ასე რომ, უსაფრთხოების ნორმებიდან გამომდინარე მივიღეთ გადაწყვეტილება,“ - განაცხადა დავით ნარმანიამ.