თეთრი სახლის პრეს-მდივნის, შონ სპაისერის თქმით, გაეროში ამერიკის წარმომადგენლის, ნიკი ჰეილის მიერ უშიშროების საბჭოს სხდომაზე გაკეთებული განცხადებები ტრამპის ადმინისტრაციის პოზიციას ემთხვევა. 2 თებერვალს საბჭოს სხდომაზე ჰეილიმ ღიად განაცხადა, რომ რუსეთს სანქციები დონბასის ოკუპაციისა და ყირიმის ანექსიის შეწყვეტამდე არ მოეხსნება, რამაც მისი რუსი კოლეგა აღაშფოთა. ვიტალი ჩურკინის თქმით, ნიკი ჰეილის გამოსვლა მისი წინამორბედის, სამანტა პაუერის ანტირუსული გამოსვლებისგან არაფრით განსხვავდებოდა.
