ვიდრე ,,ბავშვთა სამყაროს“ შენობა უსაფრთხო არ იქნება, ნებისმიერი ადამიანის შეშვება დიდ რისკთან არის დაკავშირებული, - ამის შესახებ თბილისის მერი დავით ნარმანია აცხადებს და დაზარალებულ მოვაჭრეებს მოუწოდებს დაელოდონ ექსპერტიზის დასკვნას.
„შენობა-ნაგებობების უსაფრთხოებასთან დაკავშირებით პასუხისმგებლობა ქალაქის მერიას არ ეკისრება, თუმცა ყველამ უნდა გავითავისოთ, ვიდრე შენობა უსაფრთხო არ იქნება, იქ ნებისმიერი ადამიანის შეშვება დიდ რისკთან არის დაკავშირებული. შენობა უნდა გახდეს უსაფრთხო. სწორედ ამიტომ ჩავრთეთ ლევან სამხარაულის ექსპერტიზის ეროვნული ბიუროსა და ჩვენი მუნიციპალური ლაბორატორიის ექსერტები, რათა ერთობლივად მიიღონ გადაწყვეტილება და მოგვაწოდონ ინფორმაცია, რა ფორმით უნდა მოვიქცეთ“, - განაცხადა ნარმანიამ.
სავაჭრო ცენტრ „ბავშვთა სამყაროში“ გაჩენილი ხანძრის შედეგად დაზარალებულ მოვაჭრეებსა და სამართალდამცველებს შორის სიტყვიერი შელაპარაკება ფიზიკურ დაპირისპირებაში გადაიზარდა. სამართალდამცველებმა აქციის მონაწილე რამდენიმე პირი დააკავეს.
მოვაჭრეები ადგილზე თბილისის მერიის წარმომადგენლების მისვლასა და საკუთარი ნივთების გამოტანის მიზნით, სავაჭრო ცენტრში შესვლას მოითხოვდნენ.