საერთაშორისო ორგანიზაციები ითხოვენ, რომ მეორე-მესამე თაობას, ან აქ დაბადებულებს დევნილის სტატუსი არ ჰქონდეს, მაგრამ ეს არ არის განხილვის საგანი ჩვენთან, - განაცხადა ოკუპირებული ტერიტორიებიდან იძულებით გადაადგილებულ პირთა, განსახლებისა და ლტოლვილთა მინისტრმა სოზარ სუბარმა. მისი განმარტებით, დევნილის სტატუსი დარჩება მუდმივად, ვიდრე არ მოხდება დაბრუნება.
,,მიუხედავად იმისა, რომ ბოლო 10-15 წელი საერთაშორისო ორგანიზაციები ითხოვენ, რომ ეს მოვიყვანოთ საერთაშორისო სტანდარტთან შესაბამისობაში და საერთაშორისო სტანდარტი არის ის, რომ ასეთი სტატუსი არ არსებობს. როგორც მინიმუმ ითხოვდნენ, რომ მეორე-მესამე თაობას ან აქ დაბადებულებს ეს სტატუსი არ ჰქონდეს, მაგრამ ეს არ არის განხილვის საგანი ჩვენთან. საუბარია იმაზე, რომ დღეს დევნილთა მიმართულებით იხარჯება დაახლოებით 250 მილიონი ლარი წლის განმავლობაში. ამ თანხების ეფექტურად ხარჯვის შემთხვევაში შესაძლებელი იქნება, გაცილებით მეტი სახლი ავაშენოთ დევნილებისთვის, გაცილებით მეტად დავეხმაროთ გაჭირვებულ დევნილებს. ასევე იგეგმება, გაუორმაგდეთ დახმარება იმ ყველაზე გაჭირვებულ დევნილებს, რომლებიც დღეს იღებენ 45 ლარს და ხვალ მიიღებენ 90 ლარს. წელიწადში 2 ათასი სახლი კი არ ავაშენოთ, ავაშენოთ 4-5 ათასი სახლი, რაც მოგვცემს საშუალებას, რომ მინიმუმ 3 წელიწადში ყველა დევნილი, ვისაც არ აქვს დღეს სახლი და ვინც ცხოვრობს ნგრევად ობიექტებში, დავაკმაყოფილოთ სახლით. ამის შემდეგ დარჩებიან მხოლოდ ის დევნილები, რომელთა ეკონომიკური მდგომარეობა შედარებით სტაბილურია. დღეს ჩვენ აღმოვაჩინეთ შემთხვევები, როდესაც ოფიციალური მილიონერების ოჯახები იღებნენ 45 ლარს, გვარებს არ დავასახელებ, ისევე როგორც დევნილი პოლიტიკოსების (რომელთაც აქვთ მაღალი შემოსავალი) ოჯახის წევრები იღებენ ამ 45 ლარს. მე მგონია, რომ ეს არ არის სწორი. ჩემი პოზიცია, რომ ეს თანხა გადავანაწილოთ“, - განაცხადა სოზარ სუბარმა.
დღეს, 14:00 საათზე „ნაციონალური მოძრაობა“ დევნილთა 45-ლარიანი შემწეობის გაუქმების საკითხზე ოკუპირებული ტერიტორიებიდან იძულებით გადაადგილებულ პირთა, განსახლებისა და ლტოლვილთა სამინისტროსთან აქციას გეგმავს.