ხელვაჩაურში, დაბა განთიადში სახლის ნგრევის შედეგად დაზარალებული ორსული ქალბატონის ჯანმრთელობის მდგომარეობა სტაბილურია. პაციენტი შემთხვევის ადგილიდან სასწრაფო სამედიცინო დახმარების ბრიგადამ ქ. ბათუმის დედათა და ბავშვთა ჯანმრთელობის რეგიონულ ცენტრში გადაიყვანა. 36 კვირის ორსულს ჩაუტარდა საჭირო სამედიცინო კვლევები, მკურნალი ექიმის განმარტებით ნაყოფის მდგომარეობას საფრთხე არ ემუქრება, პაციენტს მხოლოდ სახის არეში მცირედი დაჟეჟილობა აღენიშნება.
დაშავებული ქალბატონი აჭარის ჯანდაცვის მინისტრმა ზაალ მიქელაძემ და მინისტრის პირველმა მოადგილემ ლელა სურმანიძემ მოინახულეს. მინისტრის განმარტებით პაციენტის მდგომარეობა სტაბილურია, ის რჩება ექიმების მეთვალყურეობის ქვეშ და მკურნალობისთვის საჭირო ხარჯებს აჭარის ჯანდაცვის სამინისტრო დაფარავს.
ამ წუთებში აჭარის ჯანდაცვის მინისტრი ბათუმის რეფერალურ საავადმყოფოში იმყოფება, სადაც 21 წლის ლადო გორგაძეა გადაყვანილი. პაციენტის მდგომარეობა სტაბილურია, პაციენტი კონტაქტურია და უტარდება მაღალტექნოლოგიური კვლევები.
დღეს დიდთოვლობის შდეგად ხელვაჩაურის მუნიციპალიტეტში, სოფელ ზედა განთიადში თამაზ გორგაძის საცხოვრებელი სახლი დაინგრა.
