პარლამენტის ნდობის ჯგუფში სალომე ზურაბიშვილი საკუთარ კანდიდატურას წარადგენს, - ამის შესახებ განცხადებას დამოუკიდებელი დეპუტატი ავრცელებს.
,,პარლამენტის ნდობის ჯგუფში, რომელიც თავდაცვისა და უშიშროების კომიტეტში, აღმასრულებელი ხელისუფლების ორგანოების სპეციალური პროგრამებისა და საიდუმლო საქმიანობის საბიუჯეტო კონტროლისთვის იმუშავებს, შესაძლებელია ჯგუფის მე-5 წევრის ერთი ადგილი დაიკავოს როგორც ფრაქციებიდან წარდგენილმა კანდიდატებმა, ასევე დამოუკიდებელმა დეპუტატმა.
აქედან გამომდინარე, სალომე ზურაბიშვილმა აღნიშნული პოსტის დასაკავებლად წარადგინა საკუთარი კანდიდატურა და ხმასაც თავის სასარგებლოდ მისცემს“, - ნათქვამია განცხადებაში.
ნდობის ჯგუფში კვოტა, სადაც ერთი წევრის წარდგენის უფლება უმრავლესობისა და უმცირესობის გარეთ მყოფ დეპუტატებს აქვთ, შესაძლოა, პარლამენტში ერთგვარ გაუგებრობად იქცეს.
საკუთარი კანდიდატურის დასახელების უფლება ფრაქცია “საქართველოს პატრიოტებმა“ გამოიყენა და ირმა ინაშვილი უკვე წარადგინა. ამის შემდეგ კი უმრავლესობისა და უმცირესობის გარეთ ფრაქცია “ნაციონალური მოძრაობაც“ ჩამოყალიბდა, რომელიც ასევე 6-დეპუტატისაგან შედგება და ნდობის ჯგუფში აღნიშნულ ერთ ადგილზე წევრის დასახელების უფლება მასაც აქვს. ,,ჯი-ეიჩ-ენის" ინფორმაციით, სავარაუდოდ ეს სალომე სამადაშვილი იქნება.
თუკი აღნიშნული ფრაქციის წევრები სალომე ზურაბიშვილს მხარს არ დაუჭერენ და ვერც ზურაბიშვილის მხარდაჭერას მოიპოვებენ, ნდობის ჯგუფს მეხუთე წევრი არ ეყოლება.
პარლამენტის ნდობის ჯგუფი, თავდაცვისა და უშიშროების კომიტეტში, აღმასრულებელი ხელისუფლების ორგანოების სპეციალური პროგრამებისა და საიდუმლო საქმიანობის საბიუჯეტო კონტროლის მიზნით იქმნება.
საპარლამენტო უმცირესობამ საკუთარი კვოტით პარლამენტის ნდობის ჯგუფში ირაკლი აბესაძე დაასახელა. “ქართულ ოცნებას“ ამ დრომდე არ გადაუწყვეტია, თუ ვინ იქნება წარდგენილი მაჟორიტარი დეპუტატებისა და უმრავლესობის კვოტით. არაოფიციალური ინფორმაციით, მაჟორიტარებიდან – არჩილ თალაკვაძის კანდიდატურა, ხოლო უმრავლესობის კვოტით გია ბენაშვილის კანდიდატურა განიხილება.
