აქართველოს ყოფილმა პრეზიდენტმა, მიხეილ სააკაშვილმა ტელეკომპანია "რუსთავი 2"-თან საუბრისას განაცხადა, რომ შსს-ს ყოფილი სპეცრაზმელის, ვიცეპოლკოვნიკ გია ცერცვაძის საქმე ქვეყნის ისტორიაში ერთ-ერთ ყველაზე სამარცხვინო ლაქად დარჩება.
სააკაშვილმა საქართველოს მთავრობა ქვეყნის ღალატში კიდევ ერთხელ დაადანაშაულა.
"მიმაჩნია, რომ აქ რაღაც საბაბით ტექნიკურ მანიპულაციებს აქვს ადგილი. უკრაინაში ბევრი შიდა ქვედა დინებაა და ამას კარგად ვიცნობთ. მაგრამ ახლა ვერსად წაგვივლენ, გიას გავაშვებინებთ. მაგრამ, გარდა ამისა, კიდევ ერთხელ ვიმეორებ, საქართველოს მხარემ გადასცა მთელი მონაცემები. როდესმე თუ რუსეთისგან თავდასაცავად ოპერაციაში მიგვიღია მონაწილეობა... აბა რანაირად აქვთ რუსებს ეს ინფორმაცია? უკაცრავად, ეს ვისი მოცემულია? თუ არა იმ ხალხის, იმ მოღალატეების, ვინც მოაჯდა საქართველოს სახელმწიფოს და საქართველოს სახელმწიფოს ხელში არსებულ ინფორმაციას.
ახლა ყველა საქართველოს დამცველმა იცის, რომ მომავალში პრობლემები შეექმნება. ზოგი ციხეში აღმოჩნდება, ზოგს მოკლავენ, ზოგს საზღვარზე დააკავებენ და მრავალი კვირა იჯდება სადღაც, ზოგს უცხოეთში არც შეუშვებენ. ამის მიღწევა გვინდა და ამისთვის იბრძოდნენ ეს ბიჭები? ასე დაუფასა სამშობლომ? ეს არის ერთ-ერთი ყველაზე სამარცხვინო ლაქა, რაც დარჩება საქართველოს ისტორიაში. ძალიან მარიფათიანები არიან, როდესაც საქართველოს ინტერესების ღალატს მიადგება საქმე. ძალიან ეფექტურები არიან როდესაც მტერთან თანამშრომლობას ეხება საქმე. ესენი უნიათოები არ არიან, საშიშები და მოღალატეები არიან",- განაცხადა სააკაშვილმა.
ცნობისთვის, გია ცერცვაძე კიევის სასამართლომ წინასწარ პატიმრობაში დატოვა. მისი სასამართლო პროცესი კი 3 თებერვლისთვის გადაიდო.
