პარლამენტმა მთავრობის მიერ შემუშავებული საქართველოს 2017 წლის ბიუჯეტი დაამტკიცა, რომელიც გახლავთ ფისკალურ მდგრადობაზე, სწრაფ ეკონომიკურ განვითარებასა და ეკონომიკურ ზრდაზე ორიენტირებული ბიუჯეტი. ამის შესახებ საქართველოს პრემიერ-მინისტრმა, გიორგი კვირიკაშვილმა მთავრობის დღევანდელ სხდომაზე განაცხადა.
"მოგეხსენებათ, თუ რამხელა განსჯა, განხილვა მიმდინარეობს დღეს ჩვენს ქვეყანაში ჩვენს მიერ წარმოდგენილი განვითარების გეგმის, ქვეყნის ბიუჯეტის, რომელიც პირდაპირ ასახავს იმ მიზნებს და ნაბიჯებს, რომელსაც ჩვენ ვდგამთ.მინდა ორიოდე სიტყვით შევეხო, რა გეგმები გვაქვს ჩვენ, რა მიზნების მიღწევაზეა ორიენტირებული ეს ნაბიჯები, რომელსაც ჩვენ ვდგამთ. მინდა, შევეხო სამეზობლოში და გეოგრაფიულ არეალში მიმდინარე პროცესებს, სადაც ჩვენ ვიმყოფებით",-აღნიშნა პრემიერმა და ლარის კურსის თემას შეეხო.
"ლარის დევალვაციაზე, ანუ გაუფასურებაზე ბევრი ითქვა, მაგრამ კიდევ მინდა ვთქვა - იმ გეოგრაფიულ არეალში, სადაც ჩვენ ვიმყოფებით, პრაქტიკულად ჩვენი სავაჭრო პარტნიორი ქვეყნების ყველა ვალუტა გაუფასურებულია. თუ ჩვენ პროცენტულ მაჩვენებელს შევხედავთ, რაზეც ჩვენი ოპონენტები მუდმივად აპელირებდნენ, ეს იყო აბსოლუტურად საფუძველს მოკლებული, წმინდა წყლის პოლიტიკური სპეკულაციები. ეს იყო დაახლოებით 100%-ზე მეტი გაუფასურება ყველა ძირითადი ვალუტის. საუბარი მაქვს თურქულ ლირაზე, უკრაინულ ვალუტაზე, რომელიც 200%-ზე ზევით არის, ეს არის რუსული რუბლი ,რომელიც 90%-ის ფარგლებშია, აზერბაიჯანული მანათი, ასევე 100%-ს ზევით. 2012 წლის შემდეგ ქართული ლარი არის გაუფასურებული დაახლოებით 60-65%-მდე ფარგლებში. ეს არ არის კარგი, თუმცა მინდა ვთქვა, რომ საქართველო თავისი ეკონომიკური განვითარების დინამიკით, მიუხედავად ყველა იმ გამოწვევისა, რომელშიც ჩვენ ვიმყოფებით, მიუხედავად სოციალური ფონისა, რომელშიც მოსახლეობა იმყოფება, გამომდინარე ჩვენი ქვეყნის განვითარების დონიდან, იმყოფება ძალიან კარგი პირობებში, რათა ჩვენ ვიმსჯელოთ მომავალი განვითარების გეგმებზე",-აღნიშნა პრემიერ-მინისტრმა.
