უანგარო დონორობის მხარდასაჭერად მორაგბეებმა სისხლი ჩააბარეს. სპორტსმენებმა პირდაპირი სატელევიზიო ეთერიდან მოუწოდეს საზოგადოებას, რომ დონორობა მნიშვნელოვანი სამოქალაქო პასუხისმგებლობაა და ერთი ადამიანის მიერ თუნდაც ერთჯერადად გაღებული სისხლი სხვა ადამიანის სიცოცხლეს გადაარჩენს.
„ჩვენ, სპორტსმენები მხარს ვუჭერთ უანგარო დონორობას და ვფიქრობთ, რომ ჩვენი საზოგადოებაც ძალიან სოლიდარულია. გვინდა მოვუწოდოთ ადამიანებს, რომ სისხლის დონორობა არის ძალიან დიდი და კეთილი საქმე. იმდენად მნიშვნელოვანი, რომ თიოეული ადამიანი ერთხელ მაინც უნდა გახდეს დონორი. სისხლი სრულიად მოულოდნელად შეისაძლოა ნებისმიერს დასჭირდეს - ხშირია ავარიები, უბედური შემთხვევები და სხვა კრიზისული მდგომარეობები. ხშირად სჭირდებათ დახმარება ჩვენს პატარა თანამოქალაქეებს - იაშვილის ბავშვთა კლინიკიდან არაერთხელ გვსმენია, რომ პაციენტების რაოდენობიდან გამომდინარე, სისხლის არსებული მარაგები ზოგჯერ არ არის საკმარისი. იმის გამო, რომ ნებისმიერ ასეთ შემთხვევას მომზადებულები და მობილიზებულები შემხვდეთ, უნდა ვიყოთ უანგარო დონორობის მხარდამჭერები. ჩვენს მიერ გაღებული სისხლით დავეხმარებით ჩვენს მეგობრებს, ნაცნობებს, უბრალოდ რიგით ადამიანებს და ამ მცირედი ქველმოქმედებით შესაძლოა სხვისი სიცოცხლეც გადავარჩინოთ. ეს არის უდიდესი პატივი და ძალიან ღირსეული ნაბიჯი. ამიტომ ყველა, ვინც ახლა ამ ინფორმაციას ეცნობა, ერთხელ მაინც უნდა გახდეს უანგარო დონორი. ერთად მივიღო მონაწილეობა უზარმაზარ კეთილ საქმეში“,- განაცხადა სარაგბო კლუბ „ყოჩების“ წევრმა ჯაბა კიკვიძემ.
სისხლის უანგარო დონორობის მაჩვენებელი წლიდან წლამდე იზრდება, თუმცა საქართველოში ჯერაც არ არის უანგარო დონორობის ისეთი მაჩვენებელი, როგორიც დასავლეთის ზოგიერთ ქვეყანაშია - რაც გულისხმობს იმას, რომ საჭირო სისხლის პროდუქტების 100% არის უანგარო დონორობის გზით მიღებული. უანგაროდ გაღებული სისხლი ბევრად უსაფრთხო და დაცულია. უანგარო დონაციის პოპულარიზაციის მიზნით დაავადებათა კონტროლის ეროვნული ცენტრი ორგანიზაცია „არტინფო საქართველსოთან“ ერთად სპეციალურ აქტივობებს ახორციელებს.
უანგარო დონორობის მსურველს შეუძლია შევიდეს სპეციალურ ვებ-გვერდზე donori.ncdc.ge, დარეგისტრირდეს და გაიღოს სისხლი სიცოცხლის გადასარჩენად.