ქუთაისში ტექსტილის ზონის მოწყობა იგეგმება. საქართველოს საერთაშორისო ინვესტორთა ასოციაციის გენერალური მდვნის ოსმან ჩალიშქან-მჟავანაძის განმარტებით, დაგეგმილია, რომ ქუთაისში 15 ტექსტილის ახალი საწარმო გაიხსნას, რისთვისაც ასოციაციას ინვესტორების მოძიება უკვე დაწყებული აქვს.
ოსმან ჩალიშქან-მჟავანაძის თქმით, მთავრობასთან აღნიშნული პროექტი უკვე შეთანხმებულია და შესაბამისი მიწის ნაკვეთიც უკვე მოძიებულია.
მისივე ინფორმაციით, თურქული ბრენდები Penti და Dagi ქუთაისში სამკერვალო ფაბრიკების გახსნას განიხილავენ. მჟავანაძე ამბობს, რომ სამი საწარმოს მშენებლობისთვის პოტენციური ინვესტორი უკვე არსებობს და მათთან ინტენსიური მოლაპარაკებებიც წარმოებს.
საქართველოს საერთაშორისო ინვესტორთა ასოციაციის გენერალური მდივანს ოსმან ჩალიშქან-მჟავანაძეს იმედი აქვს, რომ 16 ნოემბერს სტამბოლში დაგეგმილ თურქეთი-საქართველო-აზერბაიჯანის ერთობლივ ბიზნესფორუმზეც მოხერხდება სათანადო ინვესტორების პოვნა.
პროექტის მიხედვით, თხუთმეტივე საწარმოს მშენებლობაზე და შემდგომ მისი მუშაობის პროცესში 30 ათასამდე ადამიანი დასაქმდება. ერთი საწარმოს მშენევლობა კი ინვესტორს, დაზგა/დანადგარებით აღჭურვის გარეშე 2-3 მლნ დოლარი დაუჯდება.
„ჩვენი მთავარი პრობლემა კვალიფიკაციისა და მუშახელის დეფიციტია, თუმცა ყველაფერი უნდა გაკეთდეს იმისათვის, რომ ეს პრობლემა აღმოიფხვრას. უნდა ვეცადოთ, რომ ახალი საწარმოები გაიხსნას სხვადასხვა რეგიონში, რათა რეგიონში მცხოვრები მოსახლეობის სოციალურ-ეკონომუიკური მდგომარეობა გაუმჯობესდეს და გადინება არ მოხდეს. როგორც იცით ბევრი ჩვენი თანამოქალაქე უცხოეთშია წასული და ჩვენ, ადგილზე ყველაფერი უნდა გავაკეთოთ, რომ მათ დაბრუნება მოუნდეთ“, აცხადებს ოსმან ჩალიშქან-მჟავანაძე.
