არასამთავრობო ორგანიზაცია ”სამართლიანი არჩევნების და დემოკრატიის საერთაშორისო საზოგადოება” ცენტრალური საარჩევნო კომისიის თავმჯდომარის გადაწყვეტილებაში კორუფციის წახალისების საფრთხეს ხედავს.
ორგანიზაციიაში აცხადებენ, რომ ”ქართული ოცნება - ჯანმრთელი მომავალი” პოლიტიკური გაერთიანება ”ქართული ოცნება - დემოკრატიული საქართველოს” ჩუღურეთის ორგანიზაციის თავმჯდომარესთან ერთად პედაგოგებს უფასო სამედიცინო გამოკვლევებს უტარებდა, რომელსაც თავად რიმა ბერაძე ესწრებოდა. მათი თქმით, ორგანიზაცია ”ქართული ოცნება - ჯანმრთელი მომავალის” ლოგო პარტია ”ქართული ოცნება - დემოკრატიული საქართველოს” ლოგოს ოფიციალური ფერებისა და ვიზუალის მსგავსია, ასევე, ორგანიზაციის მიერ გამოყენებული შემოკლებული სახელწოდება პარტიის სიმბოლიკის აღმნიშვნელია, რის გამოც, ”სამართლიანი არჩევნები, მიიჩნევს,რომ ორგანიზაცია აგიტაციას უწევს პარტია ”ქართული ოცნება - დემოკრატიული საქართველოს”.
ორგანიზაცია სადავოს ხდის საარჩევნო კოდექსის მე-2 მუხლის ჰ1 ქვეპუნქტს, რომლის თანახმად, წინასაარჩევნო აგიტაციას წარმოადგენს ”ამომრჩეველთა მოწოდება საარჩევნო სუბიექტის/საარჩევნო სუბიექტობის კანდიდატის მხარდასაჭერად ან საწინააღმდეგოდ, აგრეთვე ნებისმიერი საჯარო მოქმედება, რომელიც ხელს უწყობს ან ხელს უშლის მის არჩევას, ან/და რომელიც შეიცავს წინასაარჩევნო კამპანიის ნიშნებს, მათ შორის, წინასაარჩევნო ღონისძიების ორგანიზებაში/ჩატარებაში მონაწილეობა, საარჩევნო მასალების შენახვა ან გავრცელება, მხარდამჭერთა სიებზე მუშაობა, პოლიტიკური პარტიების წარმომადგენლობებში ყოფნა.“
ორგანიზაციაში აღნიშნავენ, რომ ”ქართული ოცნება - ჯანმრთელი მომავალი” დაკავებულია საქველმოქმედო საქმიანობით, რასაც ადასტურებს არაერთი სატელევიზიო სიუჟეტი, რომლის მოძიებაც ორგანიზაციის ოფიციალურ ფეისბუქ გვერდზეც არის შესაძლებელი. რაც მათი მოსაზრებით საქართველოს საარჩევნო კოდექსის 45-ე მუხლის მე-4 პუნქტის ”ზ” ქვეპუნქტის მოთხოვნას ეწინააღმდეგება, რომლის თანახმადაც, საქველმოქმედო ორგანიზაციებს ეკრძალებათ წინასაარჩევნო აგიტაციის გაწევა და აგიტაციაში მონაწილეობა.
”სამართლინი არჩევნების განცხადებით, ცესკოს თავმჯდომარის განკარგულებაში აღნიშნულია, რომ ”ქართული ოცნება -ჯანმრთელი მომავალი” მართალია დაკავებულია საქველმოქმედო საქმიანობით, თუმცა ეს ავტომატურად არ გულისხმობს ამ ორგანიზაციისთვის საქველმოქმედო ორგანიზაციის სტატუსის არსებობას და მასზე საარჩევნო კოდექსის 45-ე მუხლის მე-4 პუნქტის ”ზ” ქვეპუნქტით დადგენილი აკრძალვა ვერ გავრცელდება.
”ცესკოს თავმჯდომარის განკარგულების თანახმად, საარჩევნო კოდექსის 45-ე მუხლის მე-4 პუნქტის ”ზ” ქვეპუნქტში ხსენებულ საქველმოქმედო ორგანიზაციად უნდა ჩაითვალოს მხოლოდ ის ორგანიზაცია, რომელსაც საქართველოს საგადასახადო კოდექსის 32-ე მუხლის შესაბამისად მინიჭებული აქვს საქველმოქმედო ორგანიზაციის სტატუსი. გამომდინარე იქიდან, რომ ფინანსთა სამინისტროს ოფიციალურ ვებ-გვერდზე არსებულ საქველმოქმედო ორგანიზაციათა რეესტრში ააიპ ”ქართული ოცნება-ჯანმრთელი მომავალი” რეგისტრირებული არ არის, მას არ აქვს მინიჭებული საქველმოქმედო ორგანიზაციის სტატუსი, შესაბამისად, იგი არ არის საარჩევნო კოდექსის 45-ე მუხლი მე-4 პუნქტის ”ზ” ქვეპუნქტით განსაზღვრული აკრძალვის სუბიექტი.
„სამართლიანი არჩევნები“ მიიჩნევს, რომ ცესკოს თავმჯდომარის მიერ საარჩევნო კოდექსის ამგვარი განმარტება წარმოადგენს საარჩევნო კანონმდებლობის არაგონივრულად ვიწრო განმარტებას, რაც შემდგომში წაახალისებს პარტიების მიერ ააიპ-ების საშუალებით ქველმოქმედების გაწევას და მათი მიერ პარტიის სასარგებლოდ პირდაპირ თუ ირიბ აგიტაციას, რაც პოლიტიკური კორუფციის საშიშ ფორმას წარმოადგენს”, - აცხადებენ ორგანიზაციაში.
