პოლონეთი უკრაინის ევროკავშირში გაწევრიანების მოლაპარაკებების ფარგლებში მოლაპარაკებების კლასტერების გახსნას არ დაბლოკავს, - ამის შესახებ პოლონეთის საგარეო საქმეთა მინისტრმა რადოსლავ სიკორსკიმ კიევში უკრაინის საგარეო საქმეთა მინისტრ ანდრი სიბიჰასთან ერთობლივ პრესკონფერენციაზე განაცხადა.
მისი თქმით, უკრაინის ევროკავშირში გაწევრიანების მოლაპარაკებები მარტივი არ იქნება, ისევე როგორც თავის დროზე პოლონეთისთვის არ ყოფილა მარტივი.
„მაგრამ პოლონეთი მოლაპარაკებების კლასტერების გახსნას არ დაბლოკავს. ეს არ ნიშნავს, რომ მათი დახურვა სწრაფად მოხდება, თუმცა, ევროკომისიის შეფასებით, უკრაინა უკვე მზად არის მოლაპარაკებებისთვის“, - განაცხადა სიკორსკიმ.
„ასევე ვიმედოვნებთ, რომ უკრაინა ასოცირების შეთანხმების, მათ შორის ღრმა და ყოვლისმომცველი თავისუფალი სავაჭრო სივრცის შესახებ შეთანხმების, იმპლემენტაციის პროცესს დაასრულებს. ევროკავშირში გაწევრიანებამდეც შეძლებთ ერთიან ბაზარზე შესვლას“, - დასძინა მან.
