დღეს ბათუმში დაიწყო მე-8 გარემოსდაცვითი მინისტერიალი „გარემო ევროპისათვის“. კონფერენციას ესწრება გერმანიის გარემოს დაცვის ფედერალური უწყებისა და გერმანიის გარემოს, ბუნების დაცვისა და რეაქტორთა უსაფრთხოების ფედერალური სამინისტროს დელეგაცია, რომელსაც ხელმძღვანელობს გარემოს დაცვის ფედერალური უწყების პრეზიდენტი, ქალბატონი მარია კრაუცბერგერი. კონფერენციის მასპინძელია გაეროს ეკონომიკური კომისია ევროპისათვის (UNECE), ხოლო ორგანიზატორი - საქართველოს გარემოსა და ბუნებრივი რესურსების სამინისტრო.
პროცესი „გარემო ევროპისათვის“ (UfE-პროცესი) დაარსდა 1991 წელს, როგორც მრავალმხრივი ფორუმი EECCA-რეგიონში (აღმოსავლეთ ევროპა, კავკასია და ცენტრალური აზია) გარემოს დაცვისათვის ძალების გაერთიანებისა და გარემოს მდგომარეობის გაუმჯობესებისათვის. UfE-პროცესს მნიშვნელოვანი წვლილი შეაქვს გარემოს დაცვის სტანდარტების ამაღლებაში, გარემოს დაცვის მენეჯმენტის გაუმჯობესებასა და მდგრად და მწვანე ეკონომიკურ მოდელზე გადასვლის პროცესში.
წლევანდელი მინისტერიალის მთავარი თემებია მწვანე ეკონომიკური მოდელების განვითარება და ჰაერის ხარისხის ამაღლება უკეთესი გარემოსა და ჯანმრთელობისათვის აღნიშნულ რეგიონში. ასევე განსაკუთრებული ყურადღება გამახვილებულია UfE-პროცესის როლის გაძლიერებაზე 2030-გეგმის შესრულებაში, რაც ითვალისწინებს მდგრად განვითარებასა და კლიმატის შესახებ პარიზის ხელშეკრულების პირობების განხორციელებას. პლენარული სხდომის დროს გერმანული დელეგაციის ხელმძღვანელმა განაცხადა: „მგრადი განვითარების მიზნებისა შემუშავება და პარიზის შეთანხმებების ხელმოწერა ისტორიულ მოვლენას წარმოადგენს. ახლა კი დიდი გამოწვევები იმაში მდგომარეობს, რომ ეს მიზნები პრაქტიკაში განვახორციელოთ. ამაში მნიშვნელოვანი როლი შეუძლია ითამაშოს UfE-პროცესსა და UNECE-ის გარემოსდაცვით პროგრამას.“ ქალბატონმა კრაუცბერგერმა ღონისძიების „10 წელი - განათლება მგრადი განვითარებისთვის“ ფარგლებში ასევე ხაზი გაუსვა განათლების პრინციპულ როლს მდგრადი განვითარების საერთო საზოგადოებრივ პროცესში.
კონფერენციის ოფიციალურ ნაწილში მონაწილეობის პარალელურად დაგეგმილია ორმხრივი შეხვედრები კონფერენციაში მონაწილე პარტნიორი ქვეყნების მინისტრებთან. ასევე გაიმართება გარემოს დაცვის სფეროში გერმანიის თანამშრომლობის ოფიციალური საპრეზენტაციო ღონისძიება (“The German Cooperation Breakfast Show”). დაგეგმილია ასევე გერმანიის მიერ საქართველოში დაფინანსებული პროექტის დათვალიერება (გამწმენდი ნაგებობა ბათუმში), ღონისძიება ჰაერის ხარისხთან დაკავშირებით და მტირალასა და კოლხეთის ეროვნული პარკების მონახულება.
გარემოს დაცვისა და ენერგეტიკის სექტორები განვითარების სფეროში საქართველოსთან გერმანიის თანამშრომლობის ერთ-ერთ პრიორიტეტს წარმოადგენს. ამ თანამშრომლობის ფარგლებში გერმანია ასევე ხელს უწყობს მდგრადი ეკონომიკური განვითარებისა და ეფექტური მმართველობის პროექტებს.
1992 წლიდან სამხრეთ კავკასიის ქვეყნებთან განვითარების სფეროში თანამშრომლობის ფარგლებში გერმანიის ფედერაციულ რესპუბლიკას სულ გამოყოფილი აქვს 2,45 მილიარდი ევროს ოდენობის დახმარება.
