ევროკავშირის საბჭო მზად არის, ევროპარლამენტთან ვიზალიბერალზიაციის შეჩერების მექანიზმის საკითხზე მოლაპარაკებები გამართოს. ამის შესახებ ნათქვამია ევროკავშირის საბჭოს ოფიციალურ ვებგვერდზე გამოქვეყნებულ განცხადებაში.
განცხადებაში აღნიშნულია, რომ ევროკავშირის წევრი ქვეყნების იუსტიციისა და შინაგან საქმეთა მინისტრებმა შეათანხმეს პოზიცია ვიზალიბერალიზაციის ყველა შეთანხმების შეჩერების მექანიზმის გადახედვის ინიციატივასთან დაკავშირებით.
ევროკავშირი, ნიდერლანდების ხელმძღვანელობით, აღნიშნულ საკითხზე მოლაპარაკებებს დაიწყებს ევროპარლამენტთან, როგორც კი საკანონმდებლო ორგანი საკუთარ პოზიციას შეათანხმებს.
“ვიზალიბერალიზაციას ევროკავშირისთვის და მესამე ქვეყნებისთვის დიდი უპირატესობა აქვს. თუმცა ჩვენ გვჭირდება საგანგები ბერკეტი ყველა იმ ქვეყნისთვის, რომელთანაც უვიზო რეჟიმი იქნება, რათა დავრწმუნდეთ, რომ ვიზალიბერალიზაცია არ იქნება ბოროტად გამოყენებული. მოხარული ვარ, რომ დღეს ჩვენ შევთანხმდით მექანიზმზე, რომელიც ვიზალიბერალიზაციის ბოროტად გამოყენების წინააღმდეგ მოქმედებას გაამარტივებს”, - განაცხადა ნიდერლანდების მიგრაციის მინისტრმა, კლაას დიკჰოფმა, რომელიც საბჭოს სხდომას ხელმძღვანელობდა.
როგორც საბჭოს განცხადებაშია ნათქვამი, ევროკომისიის ინიციტივის ძირითად მიზანს წარმოადგენს შეჩერების მექანიზმის გაძლიერება, რაც ითვალისწინებს ევროკომისიის უფლებას, აამოქმედოს მექანიზმი საკუთარი ინიციატივით. ამას გარდა კომისიას დაევალება, ევროპარლამენტს და ევროკაშირის საბჭოს ყოველწლიურად წარუდგინოს ანგარიში სავიზო რეჟიმისგან გათავისუფლებული მესმე ქვეყნების მიერ ვიზალიბერალიზაციის მოთხოვნების შესრულების შესახებ.
ინიციტივის თანახმად, გაფართოვდება ვიზალიბერალიზაციის შეთანხმების შეჩერების საფუძველი. კერძოდ, ვიზალიბერალიზაცია შესაძლოა, შეჩერდეს იმ შემთხვევაში, თუ ქვეყანა უარს იტყვის რეადმისიის ფარგლებში თანამშრომლობაზე, ასევე თუ წევრი ქვეყნების სახელმწიფო პოლიტიკისა და უსაფრთხოების წინაშე რისკები გაიზრდება. ასევე, ექვსიდან ორ თვემდე შემცირდება ვიზალიბერალიზაციის მექანიზმის შეჩერების ამოქმედების ვადა. უვიზო რეჟიმის შეთანხმება შეიძლება შეჩერდეს წევრი ქვეყნისა ან ევროკომისიის მოთხოვნის საფუძველზე.
ამას გარდა, ევროკავშირის საბჭომ წარადგინა მონიტორინგის მექანიზმი, რომელიც უზრუნველყოფს იმას, რომ უვიზო რეჟიმის მქონე ქვეყნები ასრულებენ იმ კრიტერიუმებს, რომელთა საფუძველზეც მათ სავიზო რეჟიმი გაუუქმდათ.
