საპარლამენტო უმრავლესობის წევრი თამაზ მეჭიაური მიიჩნევს, რომ ევროატლანტიკურ ინტეგრაციასთან დაკავშირებით, მოსახლეობას ზედმეტ მოლოდინებს უქმნიან. საკითხზე საუბრისას მან ასევე განაცხადა, რომ ბიძინა ივანიშვილიც მეტისმეტად ოპტიმისტურად უყურებს ევროატლანტიკურ ინტეგრაციას, რაშიც ვერ ეთანხმება.
ბიძინა ივანიშვილს არ ვეთანხმები იმაში, რომ ის მეტისმეტად ოპტიმისტურად უყურებს ევროატლანტიკურ ინტეგრაციას. ევროკავშირთან არაფერი საწინააღმდეგო არ მაქვს, პირიქით, მივესალმები ევროკავშირში გაწევრიანებას, მაგრამ ის მეტისმეტი ოპტიმიზმი NATO-ში შესვლისა, რასაც არანაირი საფუძველი არ გააჩნია... მიმაჩნია, რომ ეს არის გარკვეულწილად შეცდომაში შეყვანა ჩვენი მოსახლეობის იმიტომ, რომ ამის მზაობა თვითონ NATO-ს წევრ ქვეყნებს არ გააჩნიათ. მე არ ვიცი, რას ემსახურება ასეთი მეტისმეტი ოპტიმიზმი და ხალხის დაჯერება, რომ ხვალ უფრო ახლოს ვიქნებით, ზეგ MAP-ზე უკეთესს მივიღებთ, მერე იმაზე უკეთესს და რეალობაში იმაზე შორს ვრჩებით, ვიდრე ვიყავით. უფრო საფრთხის მატარებელია, როცა ვიძახით, რომ პარალელურად ევროკავშირისა, ვიზალიბერალიზაციისა, ჩვენ რუსეთთანაც ვაწარმოებთ მოლაპარაკებებს, იქნებ როგორმე დავიბრუნოთ ტერიტორიები, მანამდე თუნდაც უვიზო მიმოსვლაზე გადავიდეთ“, - აცხადებს დეპუტატი.
