ოკუპაციის პრობლემა ჩვენთვის რჩება ძალიან მწვავე და მძიმე გამოწვევად, - ამის შესახებ პრემიერ-მინისტრმა გიორგი კვირიკაშვილმა ჟურნალისტებთან შეხვედრისას განაცხადა.
მისი თქმით, დღეს ქვეყანაში არის იმ დონის სტაბილურობა, რაც უფრო სწრაფი დინამიური განვითარების საშუალებას იძლევა.
„ჩვენ დღეს არ გვაქვს იმ დონის დაძაბულობა, მაგრამ ოკუპაციის პრობლემა ჩვენთვის რჩება ძალიან მწვავე და მძიმე გამოწვევად. უმთავრეს ფორმატად რჩება ჟენევის საერთაშორისო ფორმატი. გავხსენით ახალი, აბაშიძე-კარასინის ფორმატი, რომელიც ეხება ეკონომიკური თანამშრომლობის, ჰუმანიტარული პრობლემების გადაჭრის საკითხებს. ვფიქრობ, შედეგი სახეზეა. ყოველ შემთხვევაში, ჩვენ დღეს გვაქვს იმ დონის სტაბილურობა ქვეყანაში, რაც საშუალებას იძლევა ქვეყნის უფრო სწრაფი, დინამიური განვითარების. ეს არ მომხდარა ჩვენი დასავლური ორიენტირების მცირეოდენი კომპრომისის ხარჯზეც კი", - განაცხადა პრემიერ-მინისტრმა.
პრემიერის განცხადებით, მიუხედავად იმისა, რომ დღეს არ არის სახარბიელო დინამიკა ოკუპაციის საკითხების გადაწყვეტის მიმართულებით, გვაქვს ხელშეკრულებების ხელმოწერა ევროინტეგრაციაზე.
"კეთდება განცხადებები რეფერენდუმებზე, რუსეთითან მიერთებასთან დაკავშირებით. ეს, რა თქმა უნდა, არის საერთაშორისო კანონმდებლობის საწინააღმდეგო. არც ერთი ქვეყანა, რომელსაც აქვს მაღალი რეპუტაცია და საერთაშორისო თანამეგობრობაში რამე ინტეგრაციის პრეტენზია, ასეთი ტიპის გადაწყვეტილებებს არასოდეს მიესალმება და არ აღიარებს. უფრო მეტიც, მე საგარეო საქმეთა მინისტრობის დროს, 5 დღის განმავლობაში, 68 შეხვედრა გავმართე გაერო-ს გენერალური ასამბლეის ფარგლებში, სადაც მომიწია ძალიან აქტიური საუბარი ჩვენს არა ერთ პარტნიორ ქვეყანასთან და მათ შორის, ჩვენგან დაშორებულ ძალიან ბევრ პატარა ქვეყანასთან, რომ არაღიარების პრობლემა არ ჩამოვწიოთ ჩვენი დღის წესრიგიდან და დავტოვოთ საგარეო პოლიტიკური აქტივობის ერთ-ერთ უმნიშვნელოვანეს მიმართულებად", - განაცხადა პრემიერმა.
