”ქართული ოცნების” ყრილობას, რომელიც 14 მაისს არის დაგეგმილი სავარაუდოდ ყოფილი პრემიერ-მინისტრი ბიძინა ივანიშვილიც დაესწროს. ვიცე-პრემიერი კახა კალაძის განცხადებით ივანიშვილი ყრილობას შესაძლოა მოწვეული სტუმრის სტატუსით დაესწროს.
რაც შეეხება საარჩევნო სიის ფორმირებას, კალაძის მტკიცებით, ამ პროცესში ყოფილი პრემიერი მონაწილეობას არ ღებულობს.
”საიდან მოგაქვთ ეს ინფორმაცია. გვყავს ლიდერი, პრემიერ-მინისტრი, რომელიც პარტიის მომავალი თავმჯდომარე იქნება, არსებობს პოლიტსაბჭო. ბორდი, რომელიც ასეთ საკითხებს განიხილავს და ბატონი ბიძინა არ იღებს მონაწილეობას სიის ფორმირებაში და იმაში, ვინ უნდა იყოს მაჟოროტარობის კანდიდატი”, - განაცხადა კალაძემ.
მისივე თქმით, საარჩევნო კამპანიის დაწყების თარიღთან დაკავშირებით, პრემიერ-მინისტრმა მთავრობის გუშინდელ სხდომაზე კარგი განმარტებები გააკეთა.
”თუმცა, პრეზიდენტმა სრულიად გაუგებარი განცხადებები გააკეთა ხუთი თვით ადრე საარჩევნო კამპანიის დაწყებასთან დაკავშირებით, მაგრამ თქვენ იცით, რომ ამას მარტო პრეზიდენტი ვერ წყვეტს. ეს უნდა მოხდეს ურთიერთშეთანხმების შედეგად და შესაბამისად, იქნება გაკეთებული და მიღებული გადაწყვეტილება, რომ 8 ივლისიდან დაიწყოს, ანუ 3 თვე არის აბსოლუტურად საკმარისი იმისთვის, რომ საარჩევნო კამპანია ყველა პოლიტიკურმა პარტიამ სრულყოფილად ჩაატაროს”, - განაცხადა კალაძემ.
