დღეს, 14 აპრილს, 12:00 საათზე, საგამოფენო ცენტრ „ექსპო ჯორჯიაში“ ტურიზმის საერთაშორისო გამოფენა - „Caucasus Tourism Fair 2016” გაიხსნება, რომლის ფარგლებშიც, საქართველოს კულტურისა და ძეგლთა დაცვის სამინისტროს მხარდაჭერით, ტრადიციული ქართული სუვენირების გამოფენა-გაყიდვა გაიმართება. ღონისძიება სამი დღე გაგრძელდება.
საერთაშორისო ტურისტული გამოფენის გახსნას საქართველოს კულტურისა და ძეგლთა დაცვის მინისტრის მოადგილე მანანა ბერიკაშვილი დაესწრება.
საქართველოს კულტურისა და ძეგლთა დაცვის სამინისტროს მხარდაჭერით, გამოფენაში მონაწილეობას ქართული რეწვის ოსტატები უკვე რამდენიმე წელია იღებენ. ამ ღონისძიებით სამინისტრო ტრადიციული ქართული რეწვის და ხელნაკეთი ნივთების პოპულარიზაციას უწყობს ხელს. გამოფენა-გაყიდვაზე წარმოდგენილი იქნება როგორც ადგილობრივი, ასევე უცხოური კერძო კომპანიების პროდუქცია სხვადასხვა ქვეყნიდან. მათ შორის ესტონეთიდან, ყაზახეთიდან, სომხეთიდან, უკრაინიდან და ტაილანდიდან.
ტურიზმის საერთაშორისო გამოფენა დაინტერესებულ პირებს აძლევს შესაძლებლობას დაგეგმონ მოგზაურობა საქართველოს საუკეთესო ტურისტულ ადგილებში, გაიგონ რა სახის ტურისტულ მარშრუტებს სთავაზობენ ტურისტული სააგენტოები მსოფლიოს სხვადასხვა მიმართულებით.
ორგანიზატორი: „გამოფენების ცენტრი ექსპო ჯორჯია“.
მხარდამჭერები: საქართველოს კულტურისა და ძეგლთა დაცვის სამინისტრო, თბილისის მერია, საქართველოს ტურიზმის ეროვნული ადმინისტრაცია, საქართველოს დაცული ტერიტორიების სააგენტო.
