ფრაქცია ქართული ოცნების თავმჯდომარე გია ვოლსკი სესიაზე სიტყვით გამოსვლისას, ნაციონალურ მოძრაობასა და ვიცე-სპიკერს შორის მომხდარ სიტყვიერ დაპირისპირებას გამოეხმაურა. გია ვოლსკის განცხადებით, წინასაარჩევნო პერიოდია და ნაციონალური მოძრაობა ცდილობს ჩვეული ტაქტიკით დაძაბოს ვითარება.
„საარჩევნო პერიოდში გადავდივართ და რასაკვირველია სიმწვავე ყველა განცხადებას შეემატება და ამ პოლიტიკურ თამაშებში გამოცდილი ნაციონალური მოძრაობა არ დათმობს მუშაობის ტაქტიკას. დაწყებული ბიძინა ივანიშვილის სახელის ხშირი ხსენებით და დამთავრებული იმით, რომ საერთოდ ქვეყანაში არაფერი არ ხდება, სტაგნაციაა და თურმე არც ის ინვესტიციებია შემოსული, რომელიც აჭარბებს უკვე მილიარდ 700 მილიონს,“-განაცხადა გია ვოლსკიმ.
შეგახსენებთ, რომ დეპუტატებს შორის კამათი დღეს საკანონმდებლო ორგანოში რამდენჯერმე მოხდა. უთანხმოება პროცედურულმა საკითხებმა გამოიწვია. ნაციონალური მოძრაობა განცხადებებისთვის დროის გაზრდას ითხოვდა. კენჭისყრის ემდეგ გაირკვა, რომ ნაციონალური მოძრაობის მოთხოვნა დროის გაზრდასთან დაკავშირებით დაკმაყოფილდა. სხდომათა დარბაზში იმყოფებოდა პარლამენტის თავმჯდომარე, თუმცა დავით უსუფაშვილი მიმდინარე კამათში არ ჩარეულა.
