საქართველოს პრემიერ-მინისტრი გიორგი კვირიკაშვილი აბუ-დაბის ტახტის მემკვიდრეს, შეიხ მოჰამედ ბინ ზაიედ ალ ნაჰიანს შეხვდა. მხარეებმა ორ სახელმწიფოს შორის სავაჭრო-ეკონომიკური ურთიერთობების გაღრმავებაზე ისაუბრეს.
როგორც ტახტის მემკვიდრემ პრემიერ-მინისტრთან საუბრისას განაცხადა, ის საქართველოს შესახებ ბევრ ინფორმაციას ფლობს და დაინტერესებულია კონკრეტულ სფეროებში ინვესტიციების განხორციელებით.
თავის მხრივ, გიორგი კვირიკაშვილმა აბუ დაბის ტახტის მემკვიდრეს შეიხ მოჰამედ ბინ ზაიედ ალ ნაჰიანს მიაწოდა ინფორმაცია საქართველოში არსებულ ბიზნესგარემოზე და საინვესტიციო შესაძლებლობებზე. პრემიერ-მინისტრის თქმით, საქართველოს მთავრობა ინვესტორებს დაცულ, კონკურენტუნარიან, უსაფრთხო გარემოს სთავაზობს. მისივე თქმით, ქვეყანა სტაბიურობის კუთხით რეგიონში სამაგალითოა.
სასახლეში გამართული შეხვედრის დროს გადაწყდა, რომ არაბთა გაერთიანებული საემიროებიდან საქართველოში სპეციალური ჯგუფი ჩამოვა, რომელიც ინვესტიციების განსახორციელებლად კონკრეტულ სფეროებს შეისწავლის.
შეხვედრაზე აღინიშნა, რომ ორი ქვეყნის ურთიერთობაში სავაჭრო-ეკონომიკური თანამშრომლობის ახალი ეტაპი იწყება.
საუბრის დასასრულს, გიორგი კვირიკაშვილმა აბუ-დაბის ტახტის მემკვიდრე საქართველოში მოიწვია.
