კამპანიის - „სამართალი ითხოვს“ წარმომადგენელი ნინო ლომჯარია აცხადებს, რომ დღეს, მუდმივი ვადით, მოსამართლეებად ის ადამიანები ინიშნებიან, რომელთა მიმართაც წლების განმავლობაში სერიოზული პრეტენზიები არსებობდა. მისივე თქმით, ისინი წარსულში თვალს ხუჭავდნენ უსამართლობაზე.
„აუცილებრლია, კანონმდებლობის რეფორმირება, რაც უზრუნველყოფს მოსამართლეთა დანიშვნის პროცედურის გამჭვირვალობას, იუსტიციის საბჭოს გადაწყვეტილების დასაბუთებულობას, თუ რატომ ნიშნავენ ან არ ნიშნავენ ამა თუ იმ კანდიდატს. ასევე, აუცილებელია, მოსამართლეთა დისციპლინური პასუხისმგებლობის შესახებ კანონმდებლობის რეფორმირება, რათა საბჭოს არ ჰქონდეს შესაძლებლობა, არასასურველი მოსამართლეების მიმართ ეს მექანიზმი გამოიყენოს“,-აღნიშნა ლომჯარიამ.
მისივე თქმით, აუცილებელია, სასამართლოში საქმეები გადანაწილდეს შემთხვევითი შერჩევის საფუძველზე და არ იყოს დამოკიდებული სასამართლოს თავმჯდომარის პოზიციებზე.
„ვითხოვთ, რომ ეს ცვლილებები განხორციელდეს დაუყოვნებლივ. ჩვენ გვაქვს საკანონმდებლო წინადადებები შეთავაზებული პარლამენტისთვის. თითთეული დღე, რომელსაც საქართველოს პარლამენტი არ დაუთმობს ამ საკითხის განხილვას, ნიშნავს, რომ ქმნის ვითარებას, როდესაც სერიოზული საფრთხე შეიძლება დაემუქროს მართლმსაჯულების ინტერესებს“,-აღნიშნა ნინო ლომჯარიამ.
