სახალხო დამცველის ოფისში, 2015 წელს 7 ათასამდე განცხადება შევიდა,- ამის შესახებ ნათქვამია საქართველოს სახალხო დამცველის 2015 წელს ქვეყანაში ადამიანის უფლებებისა და თავისუფლებათა დაცვის მდგომარეობის შესახებ ანგარიშში, რომელიც საქართველოს პარლამენტს წარედგინა.
ანგარიშში აღნიშნულია, რომ მოქალაქეთა მიმართვიანობა საგრძნობლად მაღალია, რაც დარღვეული უფლებების მაჩვენებელია.
”კვლავ მაღალი იყო მოქალაქეთა მომართვიანობა სახალხო დამცველის ოფისში. 2015 წელს 7 ათასამდე განცხადება იქნა დაშვებადად მიჩნეული, რაც საგრძნობლად მაღალი მაჩვენებელია და მეტყველებს ოფისისადმი გაზრდილ მოლოდინებზე, დარღვეული უფლებების შესახებ საზოგადოების ცნობიერების ამაღლებასა და ქვეყანაში თავისუფალი გარემოს არსებობაზე”,-ნათქვამია ანგარიშში.
სახალხო დამცველი აღნიშნავს რომ,საქართველოს პარლამენტმა 2015 წელს გაიზიარა სახალხო დამცველის რეკომენდაციების მნიშვნელოვანი ნაწილი და შესაბამისი დადგენილებით სახელმწიფო უწყებებს კონკრეტული ღონისძიებების გატარება დაავალა;
”ამ მიზნით, სახალხო დამცველის რეკომენდაციების შესრულების მონიტორინგს საქართველოს პარლამენტის ადამიანის უფლებათა დაცვისა და სამოქალაქო ინტეგრაციის კომიტეტი ახორციელებს. სამწუხაროდ რამდენიმე უმნიშვნელოვანესი რეკომენდაცია კვლავ შეუსრულებელია, რაც სერიოზულ რისკებს ქმნის ქვეყანაში ადამიანის უფლებათა დაცვის თვალსაზრისით”,-ნათქვამია ანგარიშში.