ევროპის ბიზნეს ასამბლეა (EBA) 2016 წლის 29 ივნისს, გერმანიის ქალაქ ბად-ემსში გამართავს ფორუმს - International Prime Business Destinations. სხვადასხვა ნომინაციებში დაჯილდოვდებიან რეგიონალური მნიშვნელობის წარმატებული კომპანიები და მათი მენეჯერები.
მერიის ინფორმაციით, ევროპის ბიზნეს ასამბლეის საინიციატივო საბჭო რეკომენდაციას უწევს თბილისის სატრანსპორტო კომპანიას და მის გენერალურ დირექტორს ალექსანდრე ჯაფარიძეს შემდეგ ნომინაციებზე - „საუკეთესო საწარმო“ და „წლის მენეჯერი“.
„მიგვაჩნია, რომ თბილისის სატრანსპორტო კომპანია არის მაღალი პროდუქტიულობის მქონე ორგანიზაცია, რადგან ფლობს მყარ პოზიციას საერთაშორისო ბაზარზე, აქვს სურვილი გააფართოვოს საერთაშორისო თანამშრომლობის საზღვრები და უზრუნველყოს როგორც დასაქმებული პერსონალის კეთილდღეობა, ასევე მომხმარებლების კმაყოფილება მაღალი ხარისხის პროდუქციის შეთავაზებით“ - აღნიშნულია ევროპის ბიზნეს ასამბლეის (EBA) მიერ გამოგზავნილ წერილში.
აღნიშნული მიღწევა განაპირობა თბილისის სატრანსპორტო კომპანიის ერთიანი გუნდის თავდაუზოგავმა შრომამ და მაღალმა პროფესიონალიზმმა, რაც მთლიანად კომპანიისა და თითოეული თანამშრომლის წარმატებაა.