30 მარტს, აჭარის ავტონომიური რესპუბლიკის დელეგაციის პოლონეთში, კერძოდ, კატოვიცეში ვიზიტის ფარგლებში, სილეზიის უნივერსიტეტსა და ბათუმის შოთა რუსთაველის სახელმწიფო უნივერსიტეტს შორის თანამშრომლობის მემორანდუმი გაფორმდა. ხელმოწერის ცერემონიას სილეზიის უნივერსიტეტის რექტორი ბ-ნი ვიესლავ ბანიში, სილეზიის სავოევოდოს საბჭოს წევრი ბ-ნი კაზიმეჟ კაროლჟაკი და ბათუმის შოთა რუსთაველის სახელმწიფო უნივერსიტეტის რექტორის მოვალეობის შემსრულებელი მერაბ ხალვაში ესწრებოდნენ.
ბათუმის სახელმწიფო უნივერსიტეტსა და სილეზიის უნივერსიტეტს შორის სამომავლო თანამშრომლობა სხვადასხვა მიმართულებით განისაზღვრა. თანამშრომლობა მოიცავს: სტუდენტების (მათ შორის დოქტორანტების) გაცვლით პროგრამებს, საუნივერსიტეტო სემინარებში, სიმპოზიუმებსა და კონფერენციებში მონაწილეობას, აკადემიური პერსონალისა და ადმინისტრაციის მოხელეთა გაცვლით პროგრამებს, ერთობლივი სასწავლო პროგრამებისა და კურსების შექმნას, სამეცნიერო პუბლიკაციების გაცვლას, სასწავლო ვიზიტებსა და პროექტებში მონაწილეობას. შეგახსენებთ, რომ აჭარის ავტონომიური რესპუბლიკის დელეგაციის ოფიციალური ვიზიტი კატოვიცეში 29 მარტს და დაწყო და 1 აპრილამდე გაგრძელდება.
აჭარის რეგიონის ორმხრივი თანამშრომლობა პოლონეთში ქვემო სილეზიის რეგიონთან ტურიზმის, ეკონომიკის, ჯანდაცვის, განათლებისა და კულტურის მიმართულებით ბოლო წლებია წარმატებით მიმდინარეობს.