საქართველოს ოფიციალური ვიზიტით ეწვია დიდი ბრიტანეთისა და ჩრდილოეთ ირლანდიის გაერთიანებული სამეფოს საგარეო საქმეთა და თანამეგობრობის სახელმწიფო მდივანი ფილიპ ჰამონდი. ვიზიტის დასაწყისში, მან პატივი მიაგო ქვეყნის ერთიანობისათვის დაღუპულ მებრძოლებს და გვირგვინით შეამკო გმირთა მემორიალი.
ორმხრივ შეხვედრაზე, დავით ჯალაღანიამ დადებითად შეაფასა საქართველოსა და გაერთიანებულ სამეფოს შორის ჩამოყალიბებული მჭიდრო პარტნიორული ურთიერთობები პოლიტიკურ, სავაჭრო-ეკონომიკურ, თავდაცვის, კულტურის, განათლებისა და სხვა სფეროებში და იმედი გამოთქვა, რომ სამომავლოდ მაქსიმალურად იქნება გამოყენებული ეკონომიკური თანამშრომლობის კუთხით არსებული პოტენციალი. მან კმაყოფილება გამოხატა ორმხრივი თანამშრომლობის ფორმატის „უორდოპის დიალოგის“ წარმატებით მიმდინარეობაზე და აღნიშნა პოლიტიკური დიალოგის კიდევ უფრო გაღრმავების მნიშვნელობა.
ფილიპ ჰამონდმა, თავის მხრივ, განაცხადა, რომ ბრიტანეთი საქართველოს აღიქვამს, როგორც მნიშვნელოვან საერთაშორისო პარტნიორს და წარმატების მაგალითს რეგიონში. ხაზი გაესვა, რომ ეს ვიზიტი ქვეყნისადმი მკაფიო მხარდაჭერის გამოხატულებაა. მან დაადასტურა, რომ გაერთიანებული სამეფო გააგრძელებს საქართველოს სუვერენიტეტისა და ტერიტორიული მთლიანობის, აგრეთვე, ქვეყნის ევროპული და ევრო-ატლანტიკური მისწრაფებების მხარდაჭერას. ხაზი გაუსვა, რომ ისეთ ქვეყნებს, როგორიც საქართველოა, უნდა ჰქონდეთ სუვერენული არჩევანის საშუალება, გარეშე ძალების ჩარევის გარეშე. მან, აგრეთვე, აღნიშნა, რომ დღეს, მსოფლიოში არსებული გამოწვევების გათვალისწინებით, განსაკუთრებით მნიშვნელოვანია თანამშრომლობის გაღრმავება უსაფრთხოების საკითხებზე.
