თბილისის საბავშვო ბაგა-ბაღების მართვის სააგენტო გატავისუფლებული დირექტორების საკითხზე განცხადებას ავრცელებს და ყველას მოუწოდებს საკითხის პოლიტიზებისგან თავი შეიკავონ.
სააგენტოში აცხადებენ, რომ სააღმზრდელო პროცესისი ჩაშლის მცდელობისთვის ბაგა-ბაღების თანამშრომლები პასუხს აგებენ.
,,თბილისის ბაგა-ბაღების რამდენიმე გათავისუფლებული დირექტორი, გარკვეულ ჯგუფებთან ერთად ცდილობს, პროცესები პოლიტიკურ ჭრილში გადაიყვანოს და ბაღების ნორმალურ ფუნქციონირებას ხელი შეუშალოს.
თბილისის საბავშვო ბაგა-ბაღების მართვის სააგენტო მოუწოდებს ბაგა-ბაღების ყველა თანამშრომელს, ნუ ჩაერთვებიან ხელოვნურად მართულ პროცესებში, ნუ ჩაშლიან სააღმზრდელო პროცესს და ნუ შეუქმნიან მშობლებს დისკომფორტს თავიანთი უპასუხისმგებლო საქციელით.
გვინდა მოგმართოთ, რომ თუ კიდევ გაგრძელდება სააღმზრდელო პროცესის ჩაშლის მცდელობა, ნებისმიერი თანამშრომელი აგებს პასუხს საბავშვო ბაღის წესდებისა და შინაგანაწესის შესაბამისად სააღმზრდელო პროცესის ჩაშლისთვის.
მოგიწოდებთ, პასუხისმგებლობით და კეთილსინდისიერად მოეკიდოთ თქვენს სამუშაოს, დაკისრებულ მოვალეობას და ნუ ჩაერთვებით პროცესების პოლიტიზების მცდელობაში“, - ნათქვამია განცხადებაში.
თბილისის საბავშვო ბაგა-ბაღების მართვის სააგენტოს ხელმძღვანელ თემურ თორდინავასთან 83-ე და მე-2 ბაღების მშობელთა შეხვედრა უშედეგოდ დასრულდა. შეხვედრა ხმაურის ფონზე მიმდინარეობდა და მხარეები კონკრეტულ გადაწყვეტილებამდე ვერ მივიდნენ.
მშობლები ბაღების დირექტორების სამსახურიდან გათავისუფლებას აპროტესტებდნენ. ისინი თემურ თორდინავასგან ითხოვენ პასუხს - თუ რის გამო გაათავისუფლეს ბაღების დირექტორები, რაც მათივე თქმით, უსაფუძვლო იყო. თავად თორდინავა გადაწყვეტილების პოლიტიკურ მოტივს გამორიცხავს და გათავისუფლებულ დირექტორებს სასამართლოში სარჩელის შეტანას ურჩევს.
მშობლები კი საპროტესტო აქციის გამართვას გეგმავენ.
თბილისში 10-მდე საბავშვო ბაღი 24 მარტს დილიდან პარალიზებულია. მუშაობა შეწყვიტეს მასწავლებლებმა, ბაღებში ბავშვების მიყვანაზე უარს ამბობენ მშობლებიც. გადაწყვეტილება მათ მას შემდეგ მიიღეს, რაც რამდენიმე საბავშვო ბაღის დირექტორი თანამდებობიდან გაათავისუფლეს.