გორის რაიონის სოფელ ჯარიაშენში რუსი ოკუპანტების მიერ დაწყებული გზის სამშენებლო სამუშაოები იქნება ერთ-ერთი საკითხი, რომელსაც დღეს ზურაბ აბაშიძე გრიგორი კარასინთან შეხვედრაზე დააყენებს, თუმცა მისი თქმით, ამას ფორმატი არ ითვალისწინებს.
"ყველაფერი, რაც ხდება საოკუპაციო ხაზზე ან ცხინვალის რეგიონში, ხდება ჩვენს ტერიტორიაზე, ეს არ არის საზღვარი, საზღვარი სულ სხვაგან არის, ეს არის საოკუპაციო ხაზი, ამიტომ , ნებისმიერი ასეთი ქმედება თუ ინციდენტი არის ჩვენი სუვერენიტეტისა და ტერიტორიული მთლიანობის პრინციპების უხეში ხელყოფა," - აცხადებს ზურაბ აბაშიძე.
რუსეთან ურთიერთობის საკითხებში საქართველოს პრემიერის სპეციალური წარმომადგენელი არ გამორიცხავს, რომ რუსეთის მხრიდან ვიზების გაუქმების შესაძლებლობაზეც იმსჯელონ.
რაც შეეხება პირველი პირების შესაძლო შეხვედრას, ზურაბ აბაშიძის თქმით, ამ მიმართულებით სიახლე არ არის. მისი შეფასებით, თუ დაიგეგმა ასეთი შეხვედრა, მას მხოლოდ იმ შემთხვევაში ექნება აზრი, თუ საქართველოსთვის უმნიშვნელოვანეს საკითხებზე ისაუბრებენ.
