ქორწინების, როგორც ქალისა და მამაკაცის ერთობის, საკონსტიტუციო დონეზე განმტკიცებას კოალიცია „ქართული ოცნება“ მხარს უჭერს
კოალიცია ”ქართული ოცნების” პოლიტსაბჭოს სხდომაზე განხილულ საკითხთა შორის ერთ-ერთი უმთავრესი იყო - ინიცირება საკონსტიტუციო ცვლილებისა, რომელიც ქორწინების, როგორც ქალისა და მამაკაცის ერთობის, სამოქალაქო კოდექსში არსებული განმარტების საკონსტიტუციო დონეზე გამყარებას გულისხმობს, - ამის შესახებ ჟურნალისტებს საქართველოს პრემიერ-მინისტრმა, გიორგი კვირიკაშვილმა განუცხადა.
მისივე თქმით, „რესპუბლიკურმა პარტიამ“ დააფიქსირა განსხვავებული პოზიცია, რაც ეხება არა საკითხის შინაარსს, არამედ - მისი განხორციელების გზებსა და საშუალებებს.
”ჩვენ ერთხმად ვადასტურებთ კოალიციის ერთგულებას ამ პრინციპისადმი და ამავდროულად გამოვდივართ ინიციატივით, რომ ისეთი მნიშვნელოვანი ფასეულობის დაცვა, როგორიცაა ქორწინება, გარანტირებული იყოს ქვეყნის მთავარი კანონის - კონსტიტუციის დონეზე“,- აღნიშნა გიორგი კვირიკაშვილმა.
